وسىناۋ مەملەكەتتىك باعدارلاما اياسىندا ءاۋ باستا جۇمىسپەن قامتۋ ورتالىعىنا ەكى قولعا ءبىر كۇرەك ىزدەپ كەلگەن ازاماتتاردىڭ دەنى بۇگىندە جەكە كاسىبىن اشقان.
جەرگىلىكتى تۇرعىنداردى ەڭبەكپەن قامتۋدا وسىناۋ «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسىنا قاتىسقان تۇرعىندار دا شاعىن نەسيە الىپ، كاسىپتەرىن دوڭگەلەتىپ وتىر.
اتاپ ايتساق، سارىاعاش اۋدانى جۇمىسپەن قامتۋ ورتالىعىنىڭ ماماندارى جاپپاي كاسىپكەرلىكتى دامىتۋ بويىنشا 350 ادامدى بيزنەس باستامالارىن وقۋعا تارتىپ، ونىڭ ىشىندە 9 ازاماتتىڭ شاعىن نەسيە الىپ، كاسىبىن دوڭگەلەتۋىنە ىقپال ەتىپتى.
قىسقا مەرزىمدى كاسىپتىك وقۋ كۋرسىنا قاتىسقان ۇلجان الييەۆا ءقازىر شاشتاراز ماماندىعىنا ماشىقتانىپ العان. بۇگىندە تۇراقتى كليەنتتەرى شەبەردى سالونعا ارنايى ىزدەپ كەلەدى. باستاۋىش سىنىپ ءمۇعالىمى ءوز ماماندىعى بويىنشا جۇمىس تاپپاي، بىرنەشە جىل بوس جۇرگەنىن ايتادى. ءقازىر ول سۇيىكتى ىسىنەن ءناپاقا تاۋىپ وتىر.
بيىل وبلىستا 4800 ادام كاسىپتىك ءبىلىم الۋعا، قىسقا مەرزىمدى كاسىپتىك وقىتۋعا 7200 ازامات تارتىلعان. كاسىپتىك ءبىلىم الۋعا جولدانعاندار تەحنيكالىق كوللەدجدەر بازاسىندا 2، 2 جارىم جىل وقيدى. ال قىسقا مەرزىمدى كاسىپتىك وقىتۋ كۋرستارى 3 -6 اي مەرزىمگە ۇيىمداستىرىلعان.
باعدارلامادا قولونەر شەبەرلەرىن قولداۋعا دا اسا ءمان بەرىلگەن. ۇلتتىق ناقىشتاعى كيىم-كەشەك، تۇرمىسقا قاجەتتى بۇيىمدار تىگۋمەن اينالىساتىن ىسمەرلەرمەن قوسا ۇلتتىق تاعامدار ازىرلەيتىن شەبەرلەر ءقازىر 6 باعىت بويىنشا ءبىلىم الۋدا. كاسىپ اشۋعا مۇمكىندىك بەرەتىن جەڭىلدەتىلگەن شاعىن نەسيەنىڭ كولەمى دە بيىل ۇلعايتىلىپ وتىر.
