بۇگىندە تۇركىستانداعى «ASIA BREND» جيھاز كومپانياسى جىلىنا 22000 دانا جيھاز شىعارۋعا قاۋقارلى. جىلدىق قارجىلىق اينالىمى – 1،1 ملرد تەڭگە. كاسىپورىندا 150 ادام جۇمىسپەن قامتىلعان.
زاماناۋي ۇلگىدەگى تەحنولوگيالار قولدانىلاتىن كاسىپورىننىڭ جيھازدارىنا ءوز ەلىمىزبەن قاتار كورشىلەس مەملەكەتتەردەن دە سۇرانىس بار. وبلىس اكىمى كاسىپكەرگە جوبانىڭ قۋاتتىلىعىن ارتتىرىپ، ەسكسپورتقا جۇمىس ىستەۋ قاجەتتىگىن ايتتى.
ءوڭىر باسشىسى قالانى ارالاۋ بارىسىندا ءوز ءۇيىنىڭ ىرگەسىنەن بالىق شارۋاشىلىعىن دامىتىپ وتىرعان «نۇرجان» جەكە كاسىپكەرلىگىندە بولدى. كاسىپكەر نۇرجان ەلەۋسىزوۆتىڭ ايتۋىنشا، جوبا تولىق قۋاتىمەن جۇزەگە اسسا، جىلىنا 4-5 توننا بالىق وندىرە الادى. دەگەنمەن شارۋاشىلىعىن كەڭەيتۋ ءۇشىن مەملەكەتتىك قولداۋ، قوسىمشا قارجى قاجەت. وبلىس اكىمى تۇرعىننىڭ ءوتىنىشى بويىنشا قولداۋ كورسەتىلەتىنىن ايتتى.
– بالىق شارۋاشىلىعى تابىستى ءارى ءتيىمدى. سوندىقتان «اۋىل اماناتى» جوباسىنا قوسىلعان اۋىل وكرۋگتەرىندە وسى سالانى ۇيرەتىپ، جەڭىلدەتىلگەن نەسيەنى بەرگەن ءجون. ءار وتباسى وسى كاسىپپەن اينالىسىپ، تاىبىسىن ارتتىرسا، جۇمىسسىزدىق ماسەلەسى دە شەشىلەدى. جاۋاپتى باسقارما، اۋدان، قالا اكىمدىكتەرى وسىنداي شارۋاشىلىقتارعا قولداۋ كورسەتۋى ءتيىس، – دەدى وبلىس اكىمى.
دارحان ساتىبالدى وسى كۇنى «Ideal Turkestan» ءجشس-نىڭ الەۋەتىمەن تانىستى. جيھاز زاۋىتىندا 50 ادام جۇمىسپەن قامتىلعان. بۇگىندە كاسىپورىننىڭ ونىمدەرىنە سۇرانىس بار. كەزدەسۋدە كاسىپكەرلىككە قولداۋ كورسەتۋ، مەملەكەتتىك باعدارلامالاردى ءتيىمدى قولدانۋ، ءوندىرىستى جانداندىرۋ باعىتىندا ۇسىنىس-پىكىرلەر تىڭدالدى.
تۇركىستان ءوڭىرىنىڭ جيھاز شىعارۋ سالاسىنداعى الەۋەتىن جوعارى باعالاعان وبلىس اكىمى بۇل باعىتتاعى جوبالاردى جەتىلدىرە ءتۇسۋ، ەكسپورتتى ۇلعايتۋ ماڭىزدى ەكەنىن، وسىعان قاتىستى ۇسىنىستار قارالاتىنىن جەتكىزدى.
