ماڭىزدى كونفەرەنسياعا تۇركىستان وبلىسى اكىمى دارحان ساتىبالدى قاتىسىپ، قوجا احمەت ياساۋيدىڭ ۇلت رۋحانياتى ءۇشىن ماڭىزدى تۇلعا ەكەنىن ايتتى.
– تۇركىستان – ۇلتىمىزدىڭ ماقتانىشى! مەملەكەت باسشىسى قاسىم-جومارت كەمەل ۇلى وبلىسىمىزعا ءىسساپارىندا تۇركىستان ەلىمىزدىڭ رۋحاني جانە تاريحي ەلورداسى مارتەبەسىن بەرۋ ماسەلەسىن كوتەردى. قازىرگى تاڭدا وسى باعىتتا ءتيىستى جۇمىستار اتقارىلۋدا. تۇركىستان قالاسىنا بەرىلەتىن جاڭا مارتەبە، قالامىزدىڭ ودان ءارى دامۋىنا جاڭا سەرپىن بەرەتىنى ءسوزسىز. تۇركى الەمى ءۇشىن ۇلى ۇستاز – قوجا احمەت ءياساۋيدىڭ ورنى ايرىقشا. ۇلى عۇلاما ءوز ءىلىمى ارقىلى ىزگىلىكتى، بىرلىكتى، ەڭبەكتى ناسيحاتتادى. قوجا احمەت ياساۋي – قازاق رۋحانياتىنىڭ قاينار كوزى. مادەنيەتىمىز بەن ادەبيەتىمىزدىڭ كورنەكتى وكىلى. يسلام ءدىنىنىڭ ۇلى كەمەڭگەرلەرىنىڭ بىرەگەيى. ياساۋيتانۋ عىلىمىنىڭ بولاشاعى الدا دەپ ويلايمىن. تۇركىستانداعى قوجا احمەت ياساۋي كەسەنەسى – ساۋلەت ونەرىنىڭ جاۋھارى. مۇنداي ەسكەرتكىشتەر الەمدە وتە سيرەك. تاريحىمىز ءۇشىن بۇل كەسەنەنىڭ ءقادىرى وتە زور. مىنە، وسى ەكى قۇندىلىق تۇركىستاننىڭ ابىرويىن اسقاقتاتىپ تۇر. قاسيەتتى شاھاردىڭ باستى تاريحي ماعىناسى مەن ءمانى وسى مۇرالاردا جاتىر. سوندىقتان ءبىزدىڭ زەرتتەۋشىلەرىمىز بەن عالىمدارىمىز وسى تاريحي مۇرالاردى زەرتتەي تۇسەدى دەگەن سەنىم مول. «ەسكەرتكىشتەردى قورعايتىن حالىق» حالىقارالىق كونفەرەنسياسى تۇركىستاننىڭ جاڭا دەرەكتەرىن اشادى دەپ سەنەمىن، – دەدى د.ساتىبالدى.
ەجەلگى تۇركىستان جەرى «تۇركى الەمىنىڭ بەسىگى» مارتەبەسىنە يە بولۋى زاڭدىلىق. 2021 جىلى تۇركىتىلدەس مەملەكەتتەر ىنتىماقتاستىق كەڭەسىنىڭ بەيرەسمي ءسامميتى تۇركىستاندى تۇركى الەمىنىڭ رۋحاني استاناسى دەپ جاريالادى. سامميت اياسىندا مەملەكەت باسشىسى قاسىم-جومارت توقايەۆ تۇركى ەلدەرىنىڭ كوشباسشىلارىنا ماڭىزدى ۇندەۋ جاسادى. وندا قازاقستان رەسپۋبليكاسىنىڭ پرەزيدەنتى تۇركى وركەنيەتىن جاڭعىرتۋدى ەڭ الدىمەن، قوجا احمەت ياساۋي مەن قاسيەتتى تۇركىستان مۇراسىن بۇكىل الەمگە تانىستىرۋدان باستاۋعا شاقىردى.
ءياساۋيدىڭ مۇراسى قازاقستاننان تىس ەلدەردە دە بەلگىلى. ادامزاتتىڭ شابىت كوزى بولا وتىرىپ، ول رۋحاني ويلار ءۇشىن ازىق بەرىپ قانا قويماي، عالىمداردىڭ ۇرپاعىن تاربيەلەۋدىڭ نەگىزىنە اينالدى. الەمنىڭ ءارتۇرلى ەلدەرىندە ساقتالعان ۇلى تۇركى ويشىلى مەن ونىڭ ءىزباسارلارىنىڭ ەڭبەكتەرى ياساۋيتانۋشى عالىمدارىنىڭ عىلىمي زەرتتەۋلەرىنىڭ تاقىرىبى بولىپ وتىر.
قوجا احمەت ياساۋي كەسەنەسى 2003 جىلى يۋنەسكو-نىڭ بۇكىلالەمدىك مادەني مۇرا تىزىمىنە ەنگىزىلگەن. قوجا احمەت ياساۋي مۇراسىن زەرتتەۋ جانە ساقتاۋ جۇمىستارى ءسوزسىز جالعاسادى. كونفەرەنسياعا قاتىسقان عالىمدار وسىلاي وي قوزعادى.
كونفەرەنسيا تۇركىستان وبلىسىنىڭ اكىمدىگى، قازاقستان رەسپۋبليكاسى ۇكىمەتىنىڭ، حالىقارالىق سەرىكتەس ۇيىمداردىڭ (يۋنەسكو-نىڭ الماتىداعى كلاستەرلىك بيۋروسى، ميساي، IRCICA)، ۋنيۆەرسيتەتتەردىڭ (حالىقارالىق تۋريزم جانە مەيماندوستىق ۋنيۆەرسيتەتى، ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى) جانە «ازىرەت سۇلتان» مۇراجاي-قورىعىنىڭ جان-جاقتى قولداۋلارىمەن ۇيىمداستىرىلدى.
«ەسكەرتكىشتەردى قورعايتىن حالىق» كونفەرەنسياسى «ياساۋيتانۋ» عىلىمي باعىتىنىڭ جەتىستىكتەرى مەن دامۋ پەرسپەكتيۆالارىن تالقىلاۋ جانە پىكىر الماسۋ ءۇشىن ءتۇرلى باعىتتار مەن مەكتەپتەردىڭ عالىمدارىنا پلاتفورما ۇسىنىپ قانا قويماي، قوجا احمەت ياساۋي كەسەنەسىن ساقتاۋ سالاسىنداعى ادىستەر، تاسىلدەر مەن شەشىمدەردى تالقىلاۋعا ارنالىپ وتىر. سونىمەن بىرگە ەسكەرتكىشتەردى قورعاۋ، تۋريزم سالاسىن دامىتۋ ماسەلەسى دە تالقىلاندى.
پلەنارلىق وتىرىستاردا تاريحي قالالىق لاندشافتتار: ءتۋريزمدى دامىتۋ جانە نىسانداردى ساقتاۋ جولدارى قارالادى. «كيەلى نىساندار مەن قاجىلىق مارشرۋتتارىنداعى ءتۋريزمدى دامىتۋ ەرەكشەلىكتەرى»، «ورتالىق ازياداعى كيەلى ورىنداردىڭ تاريحى»، «مادەني مۇرا وبەكتىلەرىن باسقارۋ»، «كيەلى نىساندارداعى ءتۋريزمدى ىلگەرىلەتۋ جانە ماركەتينگ: ۇزدىك تاجىريبەلەر مەن ۇسىنىستار» تاقىرىبىندا سەسسيالار جۇمىس ىستەيدى. ال 27 قازان كۇنى «كيەلى تۋريزم سالاسىنداعى ءبىلىم بەرۋ مەكەمەلەرىنىڭ حالىقارالىق ىنتىماقتاستىعى»، «تۇركى حالىقتارىنىڭ مادەنيەتىندەگى رۋحاني قاباتتار»، «كيەلى مۇرا وبەكتىلەرىن ساقتاۋ، قالپىنا كەلتىرۋ، قۇجاتتامانى جۇرگىزۋ»، «ورتاعاسىرلىق قولجازبالاردى زەرتتەۋ» تاقىرىپتارى قامتىلادى. سونداي-اق قاتىسۋشىلار باسقارۋ بويىنشا «يۋنەسكو-نىڭ بۇكىلالەمدىك مۇرا نىسانى ءۇشىن جوسپار مەنەدجمەنتىن ازىرلەۋ (مەنەدجمەنت جوسپارىن ازىرلەۋدە HUL تاسىلدەرىن قولدانۋدىڭ)» پراكتيكالىق سەمينارىنا قاتىسا الادى.
