ايتۋلى شاراعا قاتىسقان وقۋ-اعارتۋ ءمينيسترى كوپشىلىكتى قۋانىشتى ساتپەن قۇتتىقتادى.
– قۇرمەتتى كيەلى دە، قاسيەتتى تۇركىستاننىڭ اردا جۇرتى. بۇگىن قۋانىشتى ءارى ۇلكەن ءىس-شاراعا قاتىسىپ وتىرعانىما ريزا بولىپ تۇرمىن. جالپى، ءاربىر اشىلعان جاڭا مەكتەپتى اعا بۋىننىڭ ەلىمىزدىڭ ەرتەڭگى ەل تىزگىنىن ۇستايتىن مىقتى ۇرپاقتى قالىپتاستىرۋعا قوسقان ۇلەسى دەپ قابىلدايمىن.
ءبىلىم سالاسىنا شىنايى جاناشىرلىعىن كورسەتىپ جۇرگەن تۇركىستان وبلىسى اكىمدىگىنە مينيسترلىك اتىنان شىنايى العىسىمدى بىلدىرەمىن. ءبىلىم-يننوۆاسيا ليسەيلەرى ساپالى ءبىلىمى مەن مىقتى كورسەتكىشتەرى ارقىلى ەلىمىزگە تانىلىپ ۇلگەرگەن. مەملەكەت مىقتى بولۋى ءۇشىن ءبىلىم تۇزەلۋى كەرەك.
سوندىقتان ءبىز وسى سالانى دامىتۋعا بارلىق مۇمكىندىكتى قاراستىرىپ جاتىرمىز. وسىنداي ۇلگىدەگى مەكتەپتەردى اۋىلعا دەيىن جەتكىزۋدى جوسپارلاپ وتىرمىز. كەز كەلگەن اۋىلدىڭ مەكتەبى جارقىراپ-جايناپ تۇرۋى كەرەك، ۇستازدارى مىقتى بولۋى قاجەت. ءاربىر ۇرپاق ءۇشىن ساپالى ءبىلىم قولجەتىمدى بولۋى ءتيىس جانە ەلىمىزدەگى مەكتەپتەر ءبىلىم-يننوۆاسيا ليسەيلەرى سياقتى جۇمىس ىستەۋى قاجەت، – دەدى عاني بەيسەمبايەۆ.
تۇركىستان وبلىسىنىڭ اكىمى دارحان ساتىبالدى وقۋشىلار مەن ۇستازدارعا ساتتىلىك تىلەدى.
– مەملەكەت باسشىسى قاسىم-جومارت كەمەل ۇلى «ءبىز وسكەلەڭ ۇرپاققا جول اشۋ ءۇشىن بارلىق جاعدايدى جاساۋىمىز كەرەك» دەي كەلە ءبىلىم ساپاسىن جاقسارتۋ، ۇستازدار مەن وقۋشىلارعا قولداۋ كورسەتۋدى تاپسىرعان بولاتىن.
وسى تاپسىرمانى ورىنداۋ ماقساتىندا وڭىردە ءبىلىم سالاسىندا اۋقىمدى جۇمىستار اتقارىلۋدا. سونىڭ ءبىر دالەلى – بۇگىن تۇركىستان تورىندە «تۇركىستان ءبىلىم-يننوۆاسيا» ليسەي-ينتەرناتىنىڭ جاڭا عيماراتىنىڭ اشىلۋ سالتاناتىنىڭ كۋاسى بولىپ وتىرمىز.
بۇگىنگى قۋانىشتى ساتكە ارنايى كەلگەنى ءۇشىن قازاقستان رەسپۋبليكاسىنىڭ وقۋ-اعارتۋ ءمينيسترى عاني بەكتايۇلىنا العىسىمدى بىلدىرەمىن. بۇل ءبىلىم ۇياسى وبلىستىق مەكتەپتەر رەيتينگىسىندە – 1 ورىندا، رەسپۋبليكادا 28-ورىندا تۇر. سوندىقتان تۇركىستان تورىندە جاڭا عيماراتىن سالىپ بەرۋدى ءجون دەپ تاپتىق.
الداعى ۋاقىتتا وسى ءبىلىم ۇياسىنا ءاربىر اۋدان، قالانىڭ ءبىلىمدى وقۋشىلارىن شوعىرلاندىرۋ جوسپارلانىپ وتىر. سونىمەن بىرگە باسقا اۋدان، قالالاردا دا وسىنداي ليسەيلەردى جاساقتاۋ كوزدەلگەن. وقۋشىلاردى كورىپ، سىزدەرگە قىزىعىپ تۇرمىن. ءبىزدىڭ بالا كەزىمىزدە مۇنداي مەكتەپتەر بولماعان.
وڭىردە مەملەكەتتىك بيۋدجەت ەسەبىنەن 33 مەكتەپتىڭ قۇرىلىسى قولعا الىندى. قازىرگى تاڭدا وسى 33 مەكتەپتىڭ 10-ى تاپسىرىلدى. جىل سوڭىنا دەيىن 10 مەكتەپ، 2024 جىلى قالعان 13 مەكتەپ پايدالانۋعا بەرىلەدى. ءبىز بۇل باعىتتاعى جۇمىستاردى جالعاستىرامىز.
ۇستازدار مەن وقۋشىلارعا تابىس تىلەيمىن. جاڭا عيمارات قۇتتى بولسىن! وسى مەكتەپتەن ەلىمىزدى باسقاراتىن ءبىلىمدى، مىقتى ازاماتتار شىعا بەرسىن! – دەدى دارحان ساتىبالدى.
اشىلۋ سالتاناتىنان كەيىن مينيستر مەن وبلىس اكىمى باستاعان توپ ليسەي-ينتەرناتتىڭ وقۋ كابينەتتەرىن، اسحاناسىن، سپورت زالىن ارالادى. زياتكەر وقۋشىلاردىڭ عىلىمي جوبالارىمەن تانىستى.
700 ورىندىق مەكتەپ زاماناۋي وقۋ قۇرالدارىمەن، ءپان كابينەتتەرىمەن، جاتاقحانامەن قامتىلعان. بۇرىن كەنتاۋداعى عيماراتتا وقىعان وقۋشىلار ەندى وسى جاڭا عيماراتتا ءبىلىم الادى.
بۇل «ءبىلىم-يننوۆاسيا» ليسەي-ينتەرناتىندا بارلىعى 416 وقۋشى بار. 2023-2024 وقۋ جىلى 7-سىنىپقا 150 وقۋشى قابىلدانسا، 8-سىنىپقا 75 وقۋشى قابىلدانعان. ليسەي-ينتەرناتتا 43 پەداگوگ جۇمىس ىستەيدى. وليمپيادالار مەن عىلىمي جوبا كونكۋرستارىنىڭ رەسپۋبليكالىق كەزەڭىنە 26 وقۋشىسى قاتىسىپ، 7 وقۋشى جەڭىمپاز اتانعان.
