زاڭ مەن ءتارتىپ يدەولوگياسىن نىعايتۋ ماقساتىندا،  ق ر سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى مەن تۇركىستان وبلىسىنىڭ اكىمدىگىنىڭ ۇيىمداستىرۋىمەن «ادال ۇرپاق – ۇلت بولاشاعى» اتتى رەسپۋبليكالىق جاس اقىنداردىڭ جىر ءمۇشايراسى ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

سىبايلاس جەمقورلىققا قارسى مادەنيەتتى قالىپتاستىرۋ جانە ادالدىق قۇندىلىقتارىن ناسيحاتتاۋ، شىعارماشىلىق بەلسەندىلىكتى ارتتىرۋ ماقساتىندا ۇيىمداستىرىلعان شاراعا رەسپۋبليكالىق ماڭىزى بار قالالار مەن وبلىستاردان جاس اقىندار قاتىستى.

بايقاۋعا قاتىسۋشىلار «ادال ۇرپاق – ۇلت بولاشاعى» جانە «تۇرلەنگەن، گۇلدەنگەن تۇركىستان» تاقىرىبىنداعى شىعارمالارىن ۇسىندى. سونىمەن قاتار جاس اقىندار ۇلى جەڭىستىڭ 80 جىلدىعىن ەلەۋسىز قالدىرماي، بەيبىت ءومىر سىيلاعان ارداگەرلەرگە قۇرمەت كورسەتىپ، ەرلىكتەرىن جىرعا قوستى.

رۋحاني شارانىڭ اشىلۋىندا ق ر سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ باسشىسى مۇرات تولەۋبايەۆ، وبلىس اكىمىنىڭ ورىنباسارى ەرتاي التايەۆ ءسوز سويلەپ، اقىندارعا ساتتىلىك تىلەدى.  سونداي-اق جاستار اراسىندا سىبايلاس جەمقورلىققا قارسى قۇندىلىقتاردى ناسيحاتتاۋ، «ادال ۇرپاق» ەرىكتى مەكتەپ كلۋبتارىنىڭ جۇمىستارىن بەلسەندى ىسكە اسىرۋعا تارتۋ بۇگىنگى كۇننىڭ ماڭىزدى جۇمىسى ەكەنىن اتاپ ءوتتى.

بايقاۋدىڭ اقتىق سايىسىنا وتكەن جاس اقىنداردىڭ اراسىنان ءتۇرلى نوميناسيالار بويىنشا جەڭىمپازدار انىقتالدى.  ناقتىراق ايتساق، قازىلار القاسىنىڭ شەشىمىمەن 1-ورىندى اتىراۋلىق جاس اقىن دولورەس رۋسلان قىزى جەڭىپ الدى. ال 2-ورىن شىمكەنت قالاسىنان كەلگەن اقسۇيكىم ءىزباسار مەن تۇركىستاندىق ايبەك بەردىشكە بۇيىرسا، 3-ورىن اباي وڭىرىنەن ادينا ومارعازينا  مەن تۇركىستان وبلىسىنان قاسىمحان يساحانعا  بەرىلدى.

ءمۇشايرادا جاس اقىندارعا ايتىسكەر اقىن اسەلحان قالىبەكوۆا، قالامگەر قانىبەك سارىبايەۆ اتىنداعى جۇلدەلەر مەن   وبلىستىق قوعامدىق دامۋ باسقارماسىنىڭ ارنايى جۇلدەلەرى تاپسىرىلدى. ودان بولەك 7 قاتىسۋشىعا ىنتالاندىرۋ سىيلىقتارى مەن العىس حاتتار تابىس ەتىلدى.

ايتا كەتەيىك، بايقاۋ «التىن وردا» قايىرىمدىلىق قوعامدىق قورىنىڭ قولداۋىمەن ءوتتى.