تۇركىستان وبلىسىنىڭ اكىمدىگىندە مىندەتتى الەۋمەتتىك ساقتاندىرۋ جۇيەسىنە حالىقتى تارتۋ جونىندەگى شتاب وتىرىسى ءوتتى. ءماجىلىستى وبلىس اكىمىنىڭ ورىنباسارى بەيسەنباي تاجىبايەۆ جۇرگىزىپ وتىردى. وڭىرلىك شتابقا جاۋاپى باسقارمالاردىڭ باسشىلارى مەن وكىلدەرى، اۋدان جانە قالا اكىمدەرىنىڭ ورىنباسارلارى ونلاين-وفلاين فورماتتا قاتىستى. كۇن تارتىبىندە ءمامس جۇيەسىنە تۇرعىنداردى قامتۋ جانە اقپاراتتاندىرۋ ماسەلەسى قارالدى،- دەپ حابارلايدى Dalanews.kz
تاقىرىپقا قاتىستى «الەۋمەتتىك مەديسينالىق ساقتاندىرۋ قورى» كەاق تۇركىستان وبلىسى بويىنشا فيليالىنىڭ باسشىسى باقىت يسماحانبەتوۆ بايانداما جاساپ، ساقتاندىرىلعان تۇرعىندار ديناميكاسىن تانىستىردى. مالىمدەۋىنشە، ءوڭىر كولەمىندە 2025 جىلدىڭ ماۋسىم ايىنداعى جاعداي بويىنشا مەديسينالىق ۇيىمدارعا تىركەلگەن ازاماتتار سانى — 2 ملن 74 مىڭنان استام. ونىڭ ىشىندە ساقتاندىرىلعاندار سانى — 83،4% بولسا، ساقتاندىرىلماعاندار سانى — 16،6%. بۇل كورسەتكىش وتكەن جىلدىڭ ءدال وسى كەزەڭىمەن سالىستىرعاندا جانە وزگە ايماقتارعا قونىس اۋدارعانداردى قوسا العاندا 29 مىڭ ادامعا تومەندەگەنى بەلگىلى بولدى.
اۋدان، قالا كەسىندىسىندەگى ستاتيستيكادا وتباسىنىڭ سيفرلىق كارتاسى ءتىزىمى تۇراقتى وزەكتەندىرىلىپ، جاڭارتىلادى. فيليال جەتەكشىسى ءمامس جارنالارىن تولەۋ مەحانيزمى جانە قاتە تولەنگەن جارنالاردى قايتارۋ الگوريتمى بار ەكەنىن ايتتى. وتىنىشتەردى جولداۋ قاعاز جۇزىندە، Egov پورتالى جانە ءموبيلدى قوسىمشاسى ارقىلى جۇرگىزىلەدى.
2025 جىلدىڭ 2 توقسانىنىڭ قورىتىندىسىنا سايكەس تۇرعىندار تاراپىنان جالپى 350-دەن استام ارىز-شاعىم كەلىپ تۇسكەن. بەيسەنباي داۋلەت ۇلى ءاربىر تالاپ-تىلەكتى نازارعا الىپ، جۇمىس جۇرگىزۋدى جۇكتەدى. وبلىس اكىمىنىڭ ورىنباسارى جۇمىستى ءتيىستى دەڭگەيدە اتقارماعان اۋدان، قالالاردىڭ جاۋاپتى باسشىلارىنا ەسكەرتۋ ايتىپ، جانداندىرۋدى تاپسىردى. مىندەتتى الەۋمەتتىك مەديسينالىق ساقتاندىرۋ جۇيەسى حالىقتىڭ مۇددەسى ءۇشىن قاجەت ەكەنىن ەسكە سالدى. حالىقتى ءمامس جۇيەسىمەن قامتاماسىز ەتۋ مەن ءاقپاراتتىق-تۇسىندىرۋ شارالارى جالعاسادى.
