«تازا قازاقستان» رەسپۋبليكالىق ەكولوگيالىق باعدارلاماسى اياسىندا ورداباسى اۋدانىندا «تازا اۋىل» ەكواكسياسى ءوتتى. تازالىق شاراسىنا اۋىل اكىمدەرى، زيالى قاۋىم وكىلدەرى، مەكەمە قىزمەتكەرلەرى، ارداگەرلەر مەن جاستار، اۋىل تۇرعىندارى قاتىستى.

سەنبىلىك بارىسىندا اۋدان ورتالىعى تەمىرلان اۋىلىندا كوشەلەردى تازالاۋ، كوگالداندىرۋ، اباتتاندىرۋ جانە قوقىستاردان تازارتۋ جۇمىستارىن جۇرگىزدى. بۇدان بولەك، اعاش تۇپتەرىن اكتەۋ، رەتسىز وسكەن بۇتا مەن شوپتەردى جيناۋ جۇمىستارى اتقارىلدى. جالپى سەنبىلىككە اۋدان بويىنشا 1 مىڭعا جۋىق ادام مەن ارنايى تەحنيكالار جۇمىلدىرىپ، 17 تونناعا جۋىق قوقىس جينالدى.

شاراعا قاتىسقان اۋداندىق ارداگەرلەر كەڭەسىنىڭ ءتوراعاسى بوستاندىق بوپەشباي ۇلى ورداباسىلىقتاردى رەسپۋبليكالىق ەكوشارانى ەل بولىپ قولداۋعا شاقىردى.

«تازالىق – دەنساۋلىق كەپىلى، بەرەكە باستاۋى. تازالىق بولعان جەردە قۇت پەن ىرىس بار. «اۋىلىنا قاراپ ازاماتىن تانى» دەمەكشى، ەل تۋرالى پىكىر ونىڭ اۋىل-ايماعىنا قاراي ايتىلادى. اينالامىز تازا، كورىكتى بولسا، ءبىز تۋرالى ايتىلار وي دا جاقسى بولماق. سوندىقتان ءوڭىرىمىزدى تازا ۇستايىق، لاستامايىق، وسكەلەڭ ۇرپاققا ۇلگى بولايىق. رەسپۋبليكالىق باستامانى بىرگە قولدايىق»، - دەدى اقساقال.

Cونداي-اق، اۋداندىق انالار كەڭەسىنىڭ ءتورايىمى زاۋرە ءابىش شارانىڭ ماڭىزدىلىعىنا توقتالدى.

– تازالىق – ادامنىڭ رۋحاني، مادەني جەتىلۋ دەڭگەيىنىڭ كورسەتكىشى. قورشاعان ورتانىڭ تازالىعىنا جاۋاپكەرشىلىكپەن قاراۋ، تابيعاتتى تازا ۇستاۋ - ءاربىر ازاماتتىڭ بورىشى. قازاق حالقى «ءبىرىنشى بايلىق – دەنساۋلىق» دەپ تەكتەن تەك ايتپاعان. مىنە، سول دەنساۋلىقتىڭ مىقتى بولۋى تازالىققا قاتىستى. دەننىڭ ساۋلىعى ءار ادام ءۇشىن قالاي ماڭىزدى بولسا، تازالىق تا ءدال سونداي ماڭىزدىلىققا يە بولۋ كەرەك.

يمانىڭنىڭ جارتىسى بولعان تازالىقتى ساقتاۋ وزىڭنەن باستالادى. اۋلاداعى قوقىستاردى شىعارۋ، قوقىستى كوشەگە تاستاماۋ - ەڭ الدىمەن تابيعاتقا، كەيىن اۋداننىڭ كوركەيۋىنە قوسقان ءبىر ۇلەس. كوشەدەگى بەي-بەرەكەت جاتاتىن قوقىستار ءسىز بەن ءبىزدىڭ دەنساۋلىعىمىزعا قانشالىقتى كەرى اسەرىن تيگىزىپ جاتقانىن كوپ جاعدايدا بايقاي بەرمەيمىز. سوندىقتان اينالامىزدى تازارتىپ، اباتتاندىرۋمەن اينالىسايىق، – دەدى ارداقتى انا.

قوعامدا ەكولوگيالىق مادەنيەتتى قالىپتاستىرۋ مەن قورشاعان ورتانى قورعاۋدا «ۇلگىلى اۋلا» جوباسى اياسىندا اۋداندىق، اۋىلدىق وڭىردەگى بەلسەندى ازاماتتاردىڭ باستاماسىمەن كوشە بويلارى، ءۇي اۋلالارى، كوپ قاباتتى ۇيلەردىڭ اينالاسى تۇراقتى تۇردە قوقىستان تازارتىلۋدا.

ايتا كەتەيىك، وبلىستا «تازا قازاقستان» تازالىق شاراسى باستالعالى وتكىزىلگەن ءىس-شارالارعا 80 مىڭعا جۋىق ەرىكتى قاتىسقان. سونداي-اق، 17 اۋدان، قالا كولەمىندە 92 مىڭعا جۋىق اعاش كوشەتتەرى جانە 10 مىڭعا جۋىق گۇل وتىرعىزىلىپ، 1 174 توننا قوقىس شىعارىلعان. سونىمەن قاتار، 198 كيەلى-مەكەندەردە، كوشە بويلارىنداعى اعاشتاردى اكتەۋ، سىرلاۋ جۇمىستارى اتقارىلىپ، قوقىس قالدىقتارى شىعارىلدى. بۇدان وزگە، تۇركىستان وبلىسى جاستار رەسۋرستىق ورتالىعىنىڭ باستاماسىمەن «جاس تۇركىستان» ەرىكتىلەر اسسوسياسياسى قۇرىلىپ، «بۇل – سەنىڭ ءوڭىرىڭ» اكسياسى نەگىزىندە 500 جاستىڭ قاتىسۋىمەن تيمبيلدينگ ۇيىمداستىرىلدى.

تۇركىستان وبلىسى وڭىرلىك كوممۋنيكاسيالار قىزمەتى