مەملەكەت باسشىسى قاسىم-جومارت توقايەۆ مەتاللۋرگتەردى ماراپاتتاۋ تۋرالى جارلىققا قول قويىپ، قوعامدى ەڭبەك ادامدارىن قۇرمەتتەۋگە شاقىرعان بولاتىن. وسىعان وراي، بۇگىن مەتاللۋرگ كۇنى قارساڭىندا وتاندىق مەتاللۋرگيا سالاسىنداعى جەمىستى ەڭبەگى، ەلىمىزدىڭ ونەركاسىپتىك جانە ينفراقۇرىلىمدىق دامۋىنا قوسقان ۇلەسى ءۇشىن جۇزدەگەن جۇمىسشى مەملەكەتتىك ناگرادالارمەن ماراپاتتالدى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

تۇركىستان وبلىسىندا دا ەڭبەك ادامىنا قۇرمەت كورسەتىلدى. وبلىس اكىمى دارحان ساتىبالدى تاجىريبەلى مەتاللۋرگ، تۇركىستان ءوڭىرىنىڭ دامۋىنا ۇلەس قوسقان مامان نۇرلان قادىرالييەۆكە «قۇرمەت» وردەنىن تاپسىردى. 1965 جىلى تۋعان ازامات شىمكەنت مەحانيكالىق زاۋىتىندا سلەسار ءارى بولات بالقىتۋشى بولعان. ءقازىر «KARLSKRONA LC AB» كومپانياسىندا باس بولات  بالقىتۋشى بولىپ جۇمىس ىستەپ ءجۇر. جالپى ەڭبەك ءوتىلى 40 جىلعا جۋىقتاعان. وبلىس اكىمى ماراپات يەسىنە پرەزيدەنتىمىزدىڭ ەڭبەك ادامدارىنا قۇرمەت كورسەتۋدەگى باستامالارى تۋرالى ايتا كەلە، تۇركىستان وبولىسىن دامىتۋدا مەتاللۋرگتەردىڭ دە ۇلەسى بار ەكەنىن جەتكىزدى.

ايتا كەتەيىك، مەملەكەت باسشىسىنىڭ جارلىعىمەن مەتاللۋرگيا سالاسىندا ىستەيتىن 22 جۇمىسشى «قۇرمەت» وردەنىنىڭ كاۆالەرى اتاندى، 41 ونەركاسىپ قىزمەتكەرى ءىىى دارەجەلى «ەڭبەك داڭقى» وردەنىنىڭ، 51 ادام «ەرەن ەڭبەگى ءۇشىن» مەدالىنىڭ يەگەرى بولدى. سونىمەن قاتار 7 مامان قازاقستان رەسپۋبليكاسى پرەزيدەنتىنىڭ قۇرمەت گراموتاسىن يەلەندى.