تۇركىستان وبلىسىنىڭ سوزاق اۋدانىنا شۋ وزەنى ارقىلى 1،5 ملرد تەكشە مەتردەن استام سۋ جىبەرىلدى،- دەپ حابارلايدى Dalanews.kz
سۋ جامبىل وبلىسىنداعى تاسوتكەل سۋ قويماسىنان جىبەرىلدى. بۇل جۇمىس تابيعاتتى قورعاۋ ماقساتىنداعى سۋ جىبەرۋ شارالارى اياسىندا بىلتىر قىركۇيەكتەن باستالىپ، بيىل ءساۋىردىڭ سوڭىنا دەيىن جۇرگىزىلدى.
سۋ سوزاق اۋدانىنا اقپان ايىندا جەتتى. قاجەتتى كولەمدى قامتاماسىز ەتۋ ءۇشىن سۋ رەسۋرستارى جانە يرريگاسيا مينيسترلىگى قىرعىز رەسپۋبليكاسىنداعى ارىپتەستەرىمەن بىرنەشە كەلىسسوز جۇرگىزدى.
سۋ رەسۋرستارى جانە يرريگاسياسى ءمينيسترى نۇرجان نۇرجىگىتوۆتىڭ تاپسىرماسى بويىنشا «قازسۋشاردىڭ» جامبىل فيليالى مەن شۋ-تالاس باسسەيندىك ينسپەكسياسىنىڭ ماماندارى شۋ وزەنى اڭعارىندا مونيتورينگ جۇرگىزىپ، تابيعاتتى قورعاۋ ماقساتىنداعى سۋ جىبەرۋ جۇمىستارىنىڭ ناتيجەسىمەن تانىستى.
جۇمىس توبى سوزاق اۋدانىمەن قاتار، جامبىل وبلىسىنىڭ شۋ، مويىنقۇم جانە سارىسۋ اۋداندارىنا دا باردى. مۇنداي كولەمدەگى سۋ سوزاق اۋدانىنا سوڭعى بەس جىلدا العاش رەت جەتىپ وتىر، سول سەبەپتى جەرگىلىكتى تۇرعىندار مينيسترلىككە العىس ءبىلدىرىپ جاتىر.
«اۋدان حالقى اتىنان سۋدىڭ جەتكىزىلىپ جاتقانىنا قۋانىشتى ەكەنىمىزدى ايتقىم كەلەدى. اپتاپ ىستىققا قاراماستان، سۋدى جەتكىزۋ باعىتىنداعى جۇمىستى جالعاستىرىپ، وزدەرىڭىز جەرگىلىكتى جەرلەرگە شىعىپ، جاعدايدى باقىلاپ وتىرعاندارىڭىزعا العىس ايتامىز»،– دەدى سوزاق اۋدانىنىڭ تۇرعىنى ريشات تاڭاتوۆ.
