مەملەكەت باسشىسى قاسىم-جومارت توقايەۆ جۋىردا وتكەن ۇكىمەتتىڭ كەڭەيتىلگەن وتىرىسىندا ايماقتارعا اۋىل شارۋاشىلىعىنىڭ ەگىس القاپتارىندا سۋدى كوپ قاجەت ەتەتىن داقىلداردى ازايتىپ، مەيلىنشە قۇرعاقشىلىققا ءتوزىمدى داقىلداردى كوبەيتۋ، سۋ ۇنەمدەيتىن تەحنولوگيانى كوپتەپ ەنگىزۋ جانە سۋدى ۇنەمدەپ پايدالانۋ مادەنيەتىن قالىپتاستىرۋ جونىندە تاپسىرما بەرگەن بولاتىن.
وسى باعىتتا اۋدان اكىم ارمان قارسىبايەۆ اۋداندا تامشىلاتىپ سۋعارۋ ادىسىمەن 370 گەكتار كۇنباعىس ءوسىرىپ جاتقان «يىرجاراگرو» ج ش س شارۋا قوجالىعىنىڭ جۇمىسىمەن تانىستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

ديقانداردىڭ وتىنىشتەرىن تىڭدادى. سونداي-اق مەملەكەت تاراپىنان جاسالاتىن قولداۋلاردى ءتۇسىندىرىپ، اۋدانداعى اۋىل شارۋاشىلىعى سالاسىن زاماناۋي تۇردە دامىتۋ كەرەكتىگىن جەتكىزدى.

جاۋشىقۇم اۋىلىنداعى «يىرجاراگرو» ج ش س شارۋا قوجالىعى تۇركيالىق ينۆەستورلارمەن بىرگە 500 گەكتار ەگىستىك القابىن يگەرىپ وتىر. بيىل 370 گەكتارىنا كۇنباعىس ەگىپ، ونى تامشىلاتىپ سۋعارۋ ادىسىمەن وسىرۋدە. بۇدان بولەك، شارۋا قوجالىعىنىڭ باسشىلىعى 100 گەكتاردان استام اۋماققا كارتوپ ەگۋدى جوسپارلاپ وتىر.

شارۋا قوجالىعى 11 ادامدى تۇراقتى جۇمىسپەن قامتىسا، جۇمىس اۋقىمىنا بايلانىستى 20-30 ادامعا قوسىمشا جۇمىس بەرىپ وتىر. مۇندا 23 اۋىل شارۋاشىلىعى تەحنيكاسى جۇمىس ىستەيدى. كۇنباعىس ءونىمىن قحر، تۇركيا، ازەربايجان ەلدەرى مەن ىشكى نارىققا وتكىزۋدى جوسپارلاعان.

«الداعى ۋاقىتتا مەملەكەتتىڭ قولداۋى اياسىندا شارۋا قوجالىعىن دامىتىپ، زاۋىت اشۋعا دا نيەتتىمىز. بۇل تامشىلاتىپ سۋعارۋ دۇنيە ءجۇزى بويىنشا سۋ تاپشىلىعىنىڭ الدىن الاتىن جانە ونىمدىلىكتى كوبەيتەتىن ءادىس دەپ بىلەمىن»، دەيدى شارۋا قوجالىعىنىڭ وكىلى ورازالى شىرشىقبايەۆ.