سايرام اۋدانى، اقسۋكەنت اۋىلدىق وكرۋگىندەگى «زاۆود اۆتوتەحنولوگيي» ءوندىرىس ورنى – وڭىردەگى ءىرى ينۆەستيسيالىق جوبالاردىڭ ءبىرى. اۋدان اكىمى ارمان ءسابيتوۆ اتالعان كاسىپورىننىڭ جۇمىس بارىسىمەن تانىستى، - دەپ حابارلايدى Dalanews.kz
زاۋىت جۇمىسىن كاسىپكەر كەرىمبەك اديشيەۆ جەتەكشىلىك ەتەتىن كوماندا جۇزەگە اسىرۋدا. جوسپار بويىنشا ءوندىرىس ورنى 2025 جىلدىڭ ماۋسىم ايىندا ىسكە قوسىلادى. وندا 80 ادام تۇراقتى جۇمىسپەن قامتىلادى.
جوبا اياسىندا ارنايى ماقساتتاعى اۆتوكولىكتەر قۇراستىرىلادى. زاۋىتتىڭ وندىرىستىك قۋاتتىلىعى جىلىنا 500 دانا ارنايى تەحنيكا شىعارۋعا جەتەدى. بۇل باستاما وتاندىق ماشينا جاساۋ سالاسىنداعى سەرپىلىس بولماق. جوبانى قارجىلاندىرۋ جەكە ينۆەستورلىق قاراجات جانە جەڭىلدەتىلگەن نەسيە ەسەبىنەن قاراستىرىلعان. تەحنيكالىق قۇرال-جابدىقتار قازاقستاننان، تمد ەلدەرىنەن جانە الىس شەتەلدەن جەتكىزىلەدى. بۇل زاۋىتتىڭ تەحنولوگيالىق بازاسىنىڭ زاماناۋي، حالىقارالىق ستاندارتتارعا ساي بولۋىن قامتاماسىز ەتەدى.
ءونىمنىڭ 80 پايىزى ىشكى نارىققا شىقسا، 20 پايىزى ەكسپورتتالماق. بۇل جوبا – ەلدىڭ ونەركاسىپتىك الەۋەتىن ارتتىرۋمەن قاتار، يمپورتقا تاۋەلدىلىكتى ازايتۋعا باعىتتالعان ناقتى قادام. جوبا ءوڭىر ەكونوميكاسىنا سەرپىن بەرىپ، جاڭا جۇمىس ورىندارىن اشۋ ارقىلى جەرگىلىكتى تۇرعىنداردىڭ الەۋمەتتىك ءال-اۋقاتىن ارتتىرۋعا ىقپال ەتەدى دەپ كۇتىلۋدە.
اۋدان باسشىسى ارمان ءسابيتوۆ زاۋىت قۇرىلىسى مەن ءوندىرىس ۇدەرىستەرىنىڭ جۇيەلى ىسكە اسىرىلۋىنا قولداۋ بىلدىرەتىندىگىن جەتكىزدى. سونداي-اق جەرگىلىكتى بيلىك تاراپىنان ينفراقۇرىلىم مەن كادرلىق قامتاماسىز ەتۋ ماسەلەلەرى نازاردا بولاتىنىن اتاپ ءوتتى.
