تۇركىستان وبلىسى، سايرام اۋدانى، قاراسۋ اۋىلىندا جاڭا شاعىناۋداننىڭ كاپسۋلاسىن سالۋ ءراسىمى ءوتتى،– دەپ حابارلايدى Dalanews.kz
جالپى اۋماعى 60 گەكتارعا جەتەتىن جاڭا قالاشىقتا جالپى 2300-گە جۋىق پاتەرلى 47 كوپقاباتتى تۇرعىن ءۇي سالىنىپ، 12 مىڭداي اۋىل حالقى قونىستانادى. قۇرىلىس جوسپارىمەن تانىسقان تۇركىستان وبلىسىنىڭ اكىمى نۇرالحان كوشەروۆ تاريحي ءساتتىڭ كۋاگەرى بولعان جەرگىلىكتى تۇرعىندارمەن كەزدەستى.
– بۇگىن ءبىز سايرام اۋدانىنىڭ دامۋى جولىنداعى اسا ماڭىزدى باستامانىڭ كۋاسى بولىپ وتىرمىز. مەملەكەت باسشىسى ءوزىنىڭ حالىققا جولداۋىندا باسپانامەن قامتۋ ماسەلەسىنە توقتالىپ وتكەن بولاتىن. وسى تاپسىرما اياسىندا وبلىسىمىزدا حالىقتى باسپانامەن قامتاماسىز ەتۋگە باعىتتالعان ناقتى جوبالار جۇزەگە اسىرىلۋدا. سايرام اۋدانىندا 63 مىڭنان استام ازامات جەر تەلىمى، ال 4 مىڭنان اسا ادام باسپانا كەزەگىندە تۇر. بۇگىن قاراسۋ اۋىلىندا 57 گەكتار جەرگە جاڭا تۇرعىن اۋداننىڭ قۇرىلىسى باستالۋدا. بۇل – تۇرعىن ءۇي تاپشىلىعىن شەشۋگە، حالىقتىڭ الەۋمەتتىك جاعدايىن جاقسارتۋعا باعىتتالعان جوبا. اۋىل تۇرعىندارىنىڭ ءۇيلى بولۋىنا، ايماقتىڭ دامۋىنا مۇمكىندىك بەرەتىن جاڭا شاعىناۋداندا كوپتەگەن الەۋمەتتىك نىساندار بوي كوتەرەدى. حالىقتىڭ تۇرمىس ساپاسىن تانىتاتىن ماڭىزدى كورسەتكىش – باسپانا. مۇقتاج جانداردى باسپانامەن قامتۋ، ولاردىڭ تۇرمىسىن تۇزەتۋ، الەۋمەتتىڭ الەۋەتىن ارتتىرۋعا مۇرىندىق بولۋ – ءار اكىمنىڭ مىندەتى. سوندىقتان وسى جۇمىستارعا بار كۇشىمىزدى سالۋىمىز كەرەك، – دەدى نۇرالحان كوشەروۆ.
جاڭا شاعىناۋداندا اكىمشىلىك عيماراتى، 600 ورىندىق زاماناۋي جاڭا مەكتەپ، 280 ورىندىق بالاباقشا، تاۋلىگىنە 250 ادام قابىلدايتىن جاڭا ەمحانا جانە مادەنيەت ءۇيى مەن جاستار سارايى بوي كوتەرەدى. سايرام اۋدانداعى مەملەكەتتىك تۇرعىن ءۇي قورىنان تۇرعىن ۇيگە مۇقتاج رەتىندە 4 206 ازامات تىركەلگەن.
قازاقتىڭ قۇتتى مەكەنى سانالاتىن اۋىلعا جاسالاتىن جاعدايعا قۋانعان تۇرعىندار ءوڭىر باسشىلىعىنا العىس ايتتى. وبلىس اكىمى ءوڭىردىڭ دامۋىنا كۇش سالىناتىنىن جەتكىزىپ، ازاماتتاردى تازالىقتى ساقتاۋعا جانە كوگالداندىرۋعا ۇلەس قوسۋعا شاقىردى. تازالىقتى ساقتاۋ مەكەمەسىنىڭ قىزمەتكەرلەرىنە العىس ءبىلدىردى.
ايتا كەتەيىك، سايرام اۋدانىندا جەرگىلىكتى بيۋدجەت ەسەبىنەن 455 ملن تەڭگە قارجى ءبولىنىپ، 20-دان استام ارنايى تەحنيكا ساتىپ الىنعان. بۇل باعىتتاعى جۇمىستار جالعاسادى. وبلىستىق بيۋدجەتتەن تەحنيكا جاڭارتۋعا 175 ملن تەڭگە قارالعان. «تازا قازاقستان» باعدارلاماسى بويىنشا جۇيەلى جۇمىس جالعاسادى.
