تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ سارىاعاش اۋدانىنا جۇمىس ساپارىمەن بارىپ، ايماقتىڭ ينفراقۇرىلىمىن دامىتۋعا باعىتتالعان ماڭىزدى نىسانداردىڭ قۇرىلىسىمەن تانىستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
سارىاعاش قالاسىندا سالىنىپ جاتقان كارىزدىك تازارتۋ قوندىرعىسىن ارالاپ، قۇرىلىس جۇمىستارىنىڭ بارىسىن كوردى. وسى رەتتە جاۋاپتى ماماندارعا ساپا ستاندارتتارىنا سايكەس جۇمىس ىستەۋدى تاپسىرىپ، ەكولوگيالىق تالاپتاردىڭ ساقتالۋىنا باسا نازار اۋدارۋدى ەسكەرتتى. سونداي-اق جۇمىستاردى ۋاقىتىندا اياقتاپ، قوندىرعىنى بەلگىلەنگەن مەرزىمدە تاپسىرۋ جۇكتەلدى.
قازىرگى تاڭدا، كارىزدىك تازارتۋ قوندىرعىسىنىڭ بيورەاكتور قابىرعالارى تۇرعىزىلىپ، سۋدىڭ شىعۋ قۇبىرى ورناتىلعان. ەلەكتر جەلىسى تارتىلىپ، وندىرىستىك عيمارات قابىرعالارىن قالاۋ جۇمىستارى جۇرگىزىلۋدە.
ايتا كەتەيىك، كارىزدىك تازارتۋ ستانسياسى ىسكە قوسىلعان سوڭ، سارقىندى سۋلار ەكولوگيالىق تالاپتارعا ساي تازارتىلىپ، وڭىردەگى سۋ رەسۋرستارىنىڭ ساپاسى جاقسارادى. بۇل جەرگىلىكتى ەكولوگياعا ەلەۋلى پايدا اكەلەدى دەپ كۇتىلۋدە. مۇنداي جوبالار وڭىردەگى سۋ رەسۋرستارىن قورعاۋ مەن جەرگىلىكتى حالىقتىڭ دەنساۋلىعىن ساقتاۋ ءۇشىن ماڭىزدى ءرول اتقارادى.
