تٷركٸستاندىق 14 جاسار وقۋشى قىز دومبىرا جاسايدى. كەلەس اۋدانى N47 د.قوناەۆ اتىنداعى جالپى بٸلٸم بەرەتٸن مەكتەبٸنٸڭ 9-سىنىپ وقۋشىسى كەۋسار سٷندەتقۇل جاس كەزٸنەن ەڭبەكقور. كٶپ بالالى ٶنەرلٸ وتباسىندا ٶسٸپ جاتقان كەۋسار اتاسىنا كٶمەكتەسٸپ دومبىرا, قوبىز, ۇلتتىق جەدٸگەرلەر مەن قولٶنەر بۇيىمدارىن جاسايدى, – دەپ حابارلايدى Dalanews.kz تٷركٸستان وبلىسى ەكٸمٸنٸڭ باسپاسٶز قىزمەتٸنە سٸلتەمە جاساپ.
– مەنٸڭ اتام 20 جىلدان بەرٸ قولٶنەرمەن اينالىسادى. اتامنىڭ كٸشكەنتاي كەزٸنەن قاسىندا جٷرٸپ, جاساعان زاتتارىنا ۇلتتىق ويۋدى بەدەرلەپ, كەيدە ٶزٸم دە تٷرلٸ بۇيىمدار جاسايمىن. ماعان بۇل قاتتى ۇنايدى. ساباقتان كەيٸن ٷيگە قاراي اسىعامىن, بوس ۋاقىتىمدى تيٸمدٸ ٶتكٸزگٸم كەلەدٸ. مەكتەپتە كٶركەم ەڭبەك پەنٸ قاتتى قىزىقتىرادى, – دەيدٸ تالانتتى وقۋشى.
اتاسى مەن نەمەرەسٸنٸڭ جاساعان قولٶنەر بۇيىمدارى, دومبىرالارى تٷرلٸ كٶرمەلەرگە قويىلعان. اۋىل تۇرعىندارى اراسىندا دا سۇرانىسقا يە. جاس شەكٸرتتٸڭ ٶزٸ وقۋدا وزات, تٷرلٸ دەڭگەيدەگٸ بايقاۋلاردا جەڭٸس تۇعىرىنان كٶرٸنٸپ كەلەدٸ
