تۇركىستانداعى «دوستىق ۇيىندە» تۇركىستان وبلىسىنىڭ اكىمى نۇرالحان كوشەروۆتىڭ توراعالىعىمەن، اعا بۋىن مەن زيالى قاۋىم وكىلدەرىنىڭ قاتىسۋىمەن «تۇركىستان قالاسىنىڭ ەرەكشە مارتەبەسى تۋرالى» زاڭنىڭ ورىندالۋى جونىندە ءماجىلىس ءوتتى،- دەپ حابارلايدى Dalanews.kz
مەملەكەت باسشىسى قاسىم-جومارت توقايەۆ «تۇركىستان قالاسىنىڭ ەرەكشە مارتەبەسى تۋرالى» قازاقستان رەسپۋبليكاسىنىڭ زاڭىنا قول قويدى. زاڭدا ەلىمىزدىڭ رۋحاني، تاريحي-مادەني، تۋريستىك ورتالىعى جانە ساۋلەت مۇراسى رەتىندەگى تۇركىستان قالاسىنىڭ ەرەكشە مارتەبەسى بەكىتىلگەن. زاڭ 13 باپتان تۇرادى. تۇركىستان قالاسىنىڭ اكىمدىگى مەن ءماسليحاتىنا 44 قوسىمشا قۇزىرەتتىلىك بەرىلەدى.
ءوڭىر باسشىسى بۇل قۇجات تۇركىستاننىڭ دامۋىنا جاڭا سەرپىن بەرەتىنىن جەتكىزدى.
"مەملەكەت باسشىسى «تۇركىستان قالاسىنىڭ ەرەكشە مارتەبەسى تۋرالى» زاڭىنا قول قويدى. اتالعان زاڭ بارشا تۇركى ەلدەرى مەن تۇركىستان قالاسىنىڭ تۇرعىندارى ءۇشىن تاريحي ءسات. بۇل – مەملەكەتىمىزدىڭ تۇركىستانعا دەگەن ەرەكشە قولداۋى دەپ بىلەمىن. وزدەرىڭىزگە بەلگىلى، كەشە پرەزيدەنتىمىز قاسىم-جومارت كەمەل ۇلىنىڭ قابىلداۋىندا بولدىم. مەملەكەت باسشىسى زاڭدا ايقىندالعان مىندەتتەردى ساپالى جۇزەگە اسىرۋ ءۇشىن ۇكىمەتپەن تىعىز قارىم-قاتىناستا جۇمىس ىستەۋدى تاپسىردى. سونىمەن قاتار وبلىس تۇرعىندارىنىڭ تۇرمىس جاعدايىن جاقسارتۋ جانە الەۋمەتتىك-ەكونوميكالىق دامۋدى قامتاماسىز ەتۋ ماقساتىندا ءتيىستى تاپسىرمالار بەردى. تاريحي تۇركىستانعا قولداۋ جالعاساتىنىن جەتكىزدى. قازاق رۋحانياتىنىڭ تەمىرقازىعىنا اينالعان كيەلى مەكەننىڭ ابىرويى ودان سايىن اسقاقتايدى. بۇل باعىتتا ەل اعالارى، اكىمدىك جانە قوعام بولىپ بىرلەسە جۇمىس ىستەۋىمىز كەرەك"، – دەگەن نۇرالحان كوشەروۆ قالا اكىمى مەن باسقارما باسشىلارىنا تاپسىرمالار بەردى.
اتاپ ايتقاندا، تۇركىستان قالاسىنىڭ وزىندىك ساۋلەت ۇلگىسىن قالىپتاستىرۋ جانە ارنايى ديزاين-كودىن بەكىتۋ، قالا قۇرىلىسى رەگلامەنتىن بەكىتۋ، كەسەنە اينالىسىندا بوتەن قۇرىلىس ەلەمەنتتەرىنە جول بەرمەۋ، تۇراقتى مونيتورينگ جاساۋ، ءتۋريزمنىڭ الەۋەتىن كوتەرۋ، تاريحي-مادەني مۇرا وبەكتىلەرىنىڭ ساقتالۋىن جانە ءبىرتۇتاستىعىن قامتاماسىز ەتۋ ءۇشىن كەشەندى شارالار قابىلداۋ، شاھاردى قولونەر ورتالىعىنا اينالدىرۋ جانە وزگە دە مىندەتتەر جۇكتەلدى.
كەزدەسۋ بارىسىندا قالا اكىمى ازىمبەك پازىلبەك ۇلى تاريحىمىزدى تۇگەندەپ، ۇلتتىق، مادەني قۇندىلىقتارىمىزدىڭ بويىنا قايتا قان جۇگىرتىپ، تەرەڭنەن ناسيحاتتاۋدا بۇل ماڭىزدى قۇجاتتىڭ الار ورنى ايرىقشا ەكەنىن جەتكىزدى.
ەل اعالارى، زيالى قاۋىم، قالا تۇرعىندارى ءوز ۇسىنىستارى مەن پىكىرلەرىن ايتىپ، تاريحي قۇجاتتىڭ قابىلدانۋىنا باستاماشى بولعان مەملەكەت باسشىسىنا، ونى جۇزەگە اسىرىپ، قولداعان ۇكىمەتكە، پارلامەنتكە العىستارىن ءبىلدىردى. تۇركىستان وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ، ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى جانار تەمىربەكوۆا، تۇركىستان وبلىستىق اقساقالدار القاسىنىڭ ءتوراعاسى جارىلقاسىن ازىرەتبەرگەن ۇلى، ساۋلەتشى ەركىن ءجۇسىپوۆ جانە قولونەر، عىلىم سالاسىنىڭ وكىلدەرى ءوز ويلارى مەن باستامالارىن ايتىپ، «تۇركىستان قالاسىنىڭ ەرەكشە مارتەبەسى تۋرالى» زاڭىنىڭ قابىلدانۋى شاھاردى ودان سايىن دامىتۋعا جول اشاتىنىنا توقتالدى. رۋحانيات، مادەنيەت، تۋريزم سالاسىندا باستامالار كوتەرىلىپ، ماسەلەلەر باقىلاۋعا الىندى.
