جاڭا وقۋ جىلىندا وبلىستىق ءبىلىم باسقارماسىنىڭ «ءبىلىم بەرۋدى دامىتۋ ورتالىعى» كمم 2024-2025 جىلدارعا ارنالعان «بارشاعا قولجەتىمدى ساپالى ءبىلىم» ۇلتتىق بايانداماسى اياسىندا تۇركىستان وبلىسىندا ىسكە اسىرىلاتىن جول كارتاسىنا سايكەس «Daryn teacher» جشس-مەن بىرلەسە وتىرىپ حالىقارالىق وقىتۋ كۋرسىن ۇيىمداستىردى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
كۋرس ءۇش كەزەڭ بويىنشا ۇيىمداستىرىلدى. ءبىرىنشى كەزەڭ ونلاين فورماتتا ءوتتى. ناتيجەسىندە ۇزدىك دەپ تانىلعاندار الماتى قالاسىندا ىرىكتەلدى. سوڭىندا ەكى كەزەڭنەن وتكەن پەداگوگتار مالايزيا جانە سينگاپۋرعا اتتاندى.
حالىقارالىق وقىتۋ كۋرسىنىڭ ءۇشىنشى كەزەڭى 2024 جىلدىڭ 24 قاراشاسى مەن 30 قاراشاسى ارالىعىندا «مۇعالىمدەردىڭ بولاشاقتاعى جانە زاماناۋي ءبىلىم بەرۋ ساپاسىن ارتتىرۋ» تاقىرىبىندا وتۋدە.
كۋرستىڭ العاشقى كۇنى پەداگوگتەر مالايزيا استاناسى كۋالا-لۋمپۋر قالاسىندا ورنالاسقان «Musium Negara Kuala Lumpur» تاريحي مۇراجايىنا بارىپ، ەل تاريحىمەن، مادەنيەتىمەن تانىستى. مۇراجايدا ەجەلگى تاس ءداۋىرىنىڭ بۇيىمدارى، مالاي حالقىنىڭ ۇلتتىق كيىمدەرى مەن تۇرمىستىق زاتتار، مونارح تاعى جانە تاعى باسقا قۇندى جادىگەرلەر قويىلعان.
كۇننىڭ ەكىنشى جارتىسىندا پەداگوگتەر كۋالا-لۋمپۋر قالاسىنىڭ كورىكتى ورىندارىنا ساياحات جاسادى. 88 قاباتتان تۇراتىن، بيىكتىگى 451 مەتر الەمگە ايگىلى «پەتروناس» قوس مۇناراسىنا بارىپ، ساۋلەت ونەرىنىڭ جەتىستىكتەرىمەن تانىستى.
مۇنارادا ورنالاسقان وكەناريۋم پەداگوگتار ءۇشىن ەرەكشە اسەر قالدىردى. سونىمەن قاتار «Taman botani perdana» بوتانيكالىق باعىنا بارىپ، سان ءتۇرلى وسىمدىكتەر الەمىنىڭ عاجايىپتارىنا كۋا بولدى.
