تۇركىستان وبلىسىنداعى 61 اۋىل ىشىمدىك ساتۋدان باس تارتتى. بۇل جايلى تۇركىستان وبلىسى پوليسيا دەپارتامەنتىنىڭ باستىعى مۇرات قابدەنوۆ وبلىس تۇرعىندارىنا ونلاين رەجيمدە ەسەپ بەرۋ كەزىندە مالىمدەدى، دەپ حابارلايدى Dalanews.kz
17 اۋداننىڭ پوليسيا باسشىلىعى جيىنعا بەينەسەلەكتور ارقىلى قوسىلدى. ەسەپ بەرۋ ترانسلياسياسى دەپارتامەنتتىڭ رەسمي پاراقشاسىندا تىكەلەي ەفيردە جۇرگىزىلدى.
«وبلىس بويىنشا 61 اۋىل ىشىمدىك ساتۋدان باس تارتتى. بۇل اراقسىز اۋىلدار قۇقىق بۇزۋشىلىق پەن قىلمىستىڭ الدىن الۋدا ماڭىزدى ءرول اتقارادى. اتالمىش اۋىلداردا سوڭعى بىرەر جىلدا قىلمىس تىركەلمەگەن، ءتارتىپ پەن تىنىشتىق ورناعان. وسىنداي بەرەكەلى اۋىلدار وزگەلەرگە ۇلگى بولۋى ءتيىس»،- دەپ اتاپ ءوتتى گەنەرال مۇرات قابدەنوۆ ءوز بايانداماسىندا.
سونداي-اق «زاڭ مەن ءتارتىپ» قاعيداتى بويىنشا وڭىردە اتقارىلىپ جاتقان پروفيلاكتيكالىق جۇمىستار مەن ق ر ءىىم ە.سادەنوۆتىڭ 2025 جىلدى «پروفيلاكتيكا جىلى» دەپ بەلگىلەۋىنە بايلانىستى وتكىزىلىپ جاتقان ءىس-شارالاردى تىلگە تيەك ەتتى. قىلمىس دەڭگەيى ازايعانىن جەتكىزدى.
ماسەلەن تۇركىستان وبلىسىندا 2024 جىلى تىركەلگەن قىلمىستىق قۇقىق بۇزۋشىلىق سانى 3،2 پايىزعا تومەندەگەن. ۇرلىق – 38،7%-عا، مال ۇرلىعى – 43،7%-عا ازايعان. پاتەر ۇرلىعىن جاساعان 8، الاياقتىق قىلمىستارىن جاساعان 23، مال ۇرلاۋمەن اينالىسقان 16 قىلمىستىق توپ ۇستالعان.
