ورداباسى اۋدانىندا قاجىمۇقان مۇڭايتپاس ۇلىنىڭ تۋعانىنا 154 جىل تولۋىنا وراي «قاجىمۇقان – الەم تانىعان تۇلعا» تاقىرىبىنداعى مادەني ءىس-شارا ءوتتى، دەپ حابارلايدى Dalanews.kz
مادەني شارا كۇش اتاسى قاجىمۇقاننىڭ ەسكەرتكىشىنە گۇل قويۋ راسىمىمەن باستالدى. ارنايى راسىمنەن كەيىن اۋدان اكىمى ازات ورالبايەۆ ءسوز سويلەپ، الىپ تۇلعانىڭ ەرلىك ەڭبەكتەرىن ەسكە ءتۇسىرىپ، ونى دارىپتەۋ ماقساتىنداعى سپورتتىق مادەني شارالارعا توقتالدى. پالۋان اتامىزدىڭ اتاعىن پاش ەتۋدە ايرىقشا ايتاتىن جايت قاجىمۇقان مۇڭايتپاسوۆ اتىنداعى الىپ عيمارات مادەني-سپورت كەشەنىنىڭ قۇرىلىسى اياقتالىپ، اشىلۋىنا ساناۋلى كۇندەر قالعانىن اتاپ ءوتتى.
سودان كەيىن قاجىمۇقان بابامىزدىڭ ۇرپاقتارى جانە سپورت قايراتكەرلەرى، اۋىل ارداگەرلەرى ونىڭ ونەگەسى جايلى ايتىپ، الىپ اتامىزدىڭ ۇرپاعى ەسكەرمەس مەرۋەرتتىڭ پالۋاننىڭ ءومىر تاريحىنا ارنالعان بايانداماسى تىڭدالدى.
سونىمەن قاتار كۇيشى قاسىمبەك سارىمبەتوۆتىڭ بابامىزعا ارنالعان «قاجىمۇقان» سازدى كۇيىنىڭ تۇساۋى كەسىلىپ، اۋداننىڭ قۇرمەتتى ازاماتى ءقۇرمانالى جىلقىباي جازعان «قاجىمۇقان» انىمەن تۇيىندەلدى.
مادەني جيىن اياقتالعان سوڭ كۇش اتاسىنىڭ رۋحىنا ارناپ اس بەرىلدى.
