ق ر ىشكى ىستەر ءمينيسترى ەرجان سادەنوۆ جۇمىس ساپارىمەن تۇركىستان وبلىسىنا كەلدى. ول تۇركىستان وبلىسىنىڭ اكىمى دارحان ساتىبالدىمەن بىرگە وڭىرلىك پوليسيانىڭ جاڭا عيماراتتارىن اشتى، دەپ حابارلايدى Dalanews.kz.
الدىمەن 100 مىڭنان استام تۇرعىنى بار ساۋران اۋدانىندا جاڭا پوليسيا عيماراتىنىڭ اشىلۋ ءراسىمى ءوتتى. ءۇش قاباتتى نىساننىڭ جالپى اۋدانى 4 مىڭ شارشى مەتردەن اسادى. عيماراتتا جۇمىس ىستەۋگە قولايلى جاعداي جاسالعان. وندا ازاماتتاردى قابىلداۋ جانە ءتيىمدى قىزمەت ەتۋ ءۇشىن قاجەتتى بارلىق زاماناۋي جابدىقتار قاراستىرىلعان.
مينيستر تاريحي ولكەدە قىزمەت اتقارىپ، تۇرعىنداردىڭ تىنىشتىعىن ساقتاۋعا ۇلەس قوسىپ جۇرگەن «ۇلتتىق ۇلان» اسكەري قىزمەتشىلەرىنىڭ قىزمەتىمەن تانىستى. تاۋەلسىزدىك جىلدارى تۇركىستان وبلىسىندا قىزمەتتىك مىندەتتەرىن اتقارۋ كەزىندە 60-تان استام پوليسيا قىزمەتكەرى قازا تاپقان. ولاردىڭ ەرلىگى ەشقاشان ۇمىتىلمايدى. وسى ماقساتتا دەپارتامەنت جانىنا ەسكەرتكىش ورناتىلدى.
مينيستر ەرجان سادەنوۆ پەن وبلىس اكىمى دارحان ساتىبالدى ەسكەرتكىشكە گۇل شوقتارىن قويىپ، ءبىر مينۋت ۇنسىزدىكپەن باتىرلاردى ەسكە الدى. سونىمەن قاتار قوناقتارعا جاڭا ارنايى تەحنيكا كورسەتىلدى. ۆەدومستۆو باسشىسى جەرگىلىكتى ءتارتىپ ساقشىلارىن جاڭا جۇمىس ورىندارىمەن قۇتتىقتاپ، ءبىرقاتار ماڭىزدى مىندەتتەر جۇكتەدى. سونىڭ ىشىندە سيفرلىق تەحنولوگيالاردى قولدانۋ اياسىن كەڭەيتۋ جانە جۇمىس پروسەستەرىن وڭتايلاندىرۋ بار. ودان بولەك قىزمەتتىك ءتارتىپتى نىعايتۋعا باسا نازار اۋداردى.
پوليسيا گەنەرال-لەيتەنانتى جاڭادان اشىلعان قىزمەت كورسەتۋ ورتالىعىنا باردى. ورتالىقتا ءبىر ۋاقىتتا 50 ادامعا قىزمەت كورسەتۋ مۇمكىندىگى قاراستىرىلعان. مۇندا پوليسيا جۇمىسىنا قاتىستى حالىقتىڭ ماسەلەلەرى جەدەل قارالادى.
