تۇركىستان وبلىسىنىڭ اكىمى نۇرالحان كوشەروۆ ورداباسى اۋدانىنا ءىس-ساپارى بارىسىندا مۇناي وڭدەۋ زاۋىتىندا بولىپ، جۇمىسىمەن تانىستى. اۋداندا ءوندىرىستى دامىتۋعا كۇش سالىنعان. ءوڭىر باسشىسى وسى باعىتتاعى جۇمىستارعا باسىمدىق بەرۋدى تاپسىردى،- دەپ حابارلايدى Dalanews.kz
ورداباسى اۋدانىندا «Standard Petroleum & Co» ءجشس-نىڭ مۇناي وڭدەۋ زاۋىتىنىڭ ءبىرىنشى كەزەڭىن جىل سوڭىندا ىسكە قوسۋ جوسپارلانعان. ءوندىرىس ورنىندا 300 ادام تۇراقتى جۇمىس ورنىمەن قامتىلماق.
قۋاتتىلىعى جىلىنا 2،0 ملن. توننانى قۇرايتىن ءىرى جوبانىڭ ينۆەستيسيا قۇنى 130،0 ملرد. تەڭگە. بۇگىندە قۇرىلىس-مونتاج جۇمىستارى قارقىندى جۇرگىزىلۋدە. اكىمشىلىك جانە زاۋىت الدى ايماعىندا جالپى قۇرىلىس جۇمىستارى اياقتالىپ، تەحنولوگيالىق جابدىقتار ورناتىلۋدا. بيۋدجەتتىك قاراجات ەسەبىنەن بارلىق قاجەتتى ينفراقۇرىلىم تارتىلعان. 1،2 كم اۆتوجول جانە 14 كم تەمىرجول توسەلىپ، پايدالانۋعا بەرىلگەن.
جوسپار بويىنشا ماڭىزدى ينۆەستيسيالىق جوبانىڭ II كەزەڭى 2026 جىلدىڭ سوڭىنا دەيىن تولىق اياقتالادى. جاڭا مۇناي وڭدەۋ زاۋىتىندا جىلىنا 377،8 مىڭ توننا ەۋرو-5 بەنزينى، 426 مىڭ توننا ەۋرو-6 ديزەلى وندىرىلەدى. ءوڭىر ەكونوميكاسىن دامىتۋداعى ماڭىزدى باعىتتاردىڭ ءبىرى – ينۆەستيسيا تارتۋ. 2 جىلدا تۇركىستان وبلىسىنىڭ ەكونوميكاسىنا 2 ترلن تەڭگەدەن استام ينۆەستيسيا تارتىلىپ، ءوسىمنىڭ وڭ ديناميكاسى قالىپتاستى. جىل باسىنان 196،5 ملرد. تەڭگە ينۆەستيسيا تارتىلدى.
وبلىس ەكونوميكاسىنىڭ دامۋىنا تىڭ سەرپىن بەرەتىن جانە 2025-2028 جىلدارى جۇزەگە اسىرىلاتىن 110 ينۆەستيسيالىق جوبا پۋلى قالىپتاستىرىلدى. جوبالاردىڭ جالپى قۇنى – 2،3 ترلن. تەڭگە. 19 783 جۇمىس ورنىن اشىپ، قوسىمشا 84 ملرد. تەڭگە سالىق ءتۇسىرۋ كوزدەلگەن. ونىڭ ىشىندە، بيىل 322 ملرد. تەڭگەگە 57 ينۆەستيسيالىق جوبانى ىسكە قوسىپ، 6908 جۇمىس ورنىن قۇرۋ جوسپارلانۋدا.
