دەپارتامەنت باسشىسىنىڭ ايتۋىنشا، بۇعان دەيىن تىيىم سالىنعان بالالارعا ارنالعان ويىن-ساۋىق ورتالىقتارىنىڭ جۇمىس ىستەۋىنە رۇقسات بەرىلەدى. ويىن الاڭدارى مەن جابىق ءۇي جايلارداعى اتتراكسيوندار 30%-عا تولتىرىلا وتىرىپ، ساعات 09.00-دەن 22.00-گە دەيىن قىزمەت كورسەتەدى.
– بيليارد، بوۋلينگ جانە كومپيۋتەرلىك كلۋبتار دا 30%-عا تولتىرىلا وتىرىپ جۇمىس ىستەي باستايدى. قوعامدىق تاماقتانۋ ورىندارىنىڭ جۇمىس ىستەۋ ۋاقىتى 22:00 دەن 24:00-گە دەيىن ۇزارتىلدى. مەيرامحانالاردىڭ بانكەت زالدارىندا اس بەرۋگە رۇقسات ەتىلدى. دەگەنمەن تولتىرىلۋى – 50%-عا دەيىن، 50 ورىندىقتان اسپاۋ قاجەت. سونىمەن قاتار، كىتاپحانالار مەن مۇراجايلاردىڭ قىزمەتى، تەاترلار، كينوتەاترلار، كونسەرت زالدارى، فيلارمونيالاردىڭ قىزمەتى بۇعان دەيىن تولىمدىلىعى 20%-عا دەيىن بولسا، جاڭا قاۋلىعا سايكەس تولىمدىلىعى 30% بولادى. ال فيتنەس جانە سپورتتىق-ساۋىقتىرۋ ورتالىقتارىنىڭ قىزمەتى ساعات 10.00-دەن 24.00-گە دەيىن ۇزارتىلدى، – دەدى اسقار بەكبولات ۇلى.
جيىنعا قاتىسقان وبلىستىق قوعامدىق دەنساۋلىق باسقارماسى باسشىسىنىڭ ورىنباسارى التىن دوسانوۆا وڭىردەگى ەپيدەميالىق احۋالعا توقتالدى.
– تۇركىستان وبلىسىندا پاندەميا باستالعالى بەرى «COVID-19» ىندەتىمەن تىركەلگەن جاعدايلار سانى بۇگىنگى تاڭعا 5 956 قۇراپ وتىر. جازىلىپ شىققاندار سانى – 5 503، قايتىس بولعاندار – 52. سوڭعى تاۋلىكتە 17 ادام كۆي اۋرۋشاڭدىقپەن تىركەلگەن. قازىرگى تاڭدا 598 ادام كوروناۆيرۋستىق ينفەكسياسىمەن ەمدەلۋدە، ونىڭ ىشىندە 508ء-ى ينفەكسيالىق ستاسيوناردا، ال 90-ى كارانتيندىك ستاسيوناردا جانە 319 ادام ءۇي كارانتينىندە باقىلاۋدا. تۇركىستان وبلىسىنا اقپان ايىنان باستاپ جالپى 180 100 دوزا ۆاكسينا جەتكىزىلگەن. بۇگىنگى كۇنگە دەيىن – 178 379 ادام 1ء-شى كومپونەنتپەن ۆاكسينا قابىلدادى. سونىمەن قاتار، 22 اقپاننان باستاپ ريەۆاكسيناسيا وتكىزىلىپ، بارلىعى 43 083 ادامعا سالىندى، – دەدى التىن مەيرامباي قىزى.
بريفينگكە قاتىسقان «اتامەكەن» كاسىپكەرلەر پالاتاسى ديرەكتورىنىڭ ورىنباسارى زۋحرا اميروۆاتۇركىستان وبلىسىندا 150-دەن اسا كاسىپكەر «Ashyq» جوباسى ارقىلى جۇمىس ىستەپ جاتقاندىعىن جەتكىزدى.
«تۇركىستان وبلىسىندا «Ashyq» جوباسىنا قاتىسۋعا ءوتىنىم بەرگەن كاسىپكەرلەردىڭ سانى كۇن سايىن ارتىپ كەلەدى. 18 مامىرداعى جاعداي بويىنشا تۇركىستان وبلىسىنىڭ كاسىپكەرلەرىنەن 223 ءوتىنىم كەلىپ تۇسكەن. ونىڭ ىشىندە 155 نىسان QR كود الىپ جۇمىس ىستەۋدە. ال قالعان وتىنىمدەر بويىنشا ءتيىستى رۇقسات قۇجاتتارىن تەكسەرۋ جۇمىستارى جۇرگىزىلىپ، QR كود الۋ ءۇشىن جولدانۋدا» دەدى ول.
