الەۋمەتتىك جەلىدە تۇركىستان وبلىسى تولەبي اۋدانى لەڭگىر قالاسىندا ەكس-مينيستر بيشىمبايەۆتىڭ اجەسىنىڭ ەسىمى كوشەگە بەرىلگەنى تۋرالى اقپارات تارادى. Dalanews.kz ءمان-جايدى انىقتادى.

"قۋاندىق بيشىمبايەۆتىڭ اكەسى وسى تۇركىستان وبلىسىنىڭ تۋماسى ەكەن"، - دەپ جازىلعان جەلىدەگى اقپاراتتا.

وبلىس اكىمدىگىنىڭ باسپا ءسوز قىزمەتىنە جۇگىنگەندە، راسىندا دا، تۇركىستان وبلىسىندا ماريا بيشىمبايەۆا اتىنداعى كوشە بار بولىپ شىقتى. دەگەنمەن ءبىر نيۋانس بار.

"بيشىمبايەۆا ءماريام - تولەبي اۋدانىنىڭ قۇرمەتتى ازاماتى. اۋدانعا ەڭبەگى سىڭگەنى ءۇشىن تولەبي اۋدانى، لەڭگىر قالاسىنداعى بۇرىنعى اتاۋى سادوۆايا كوشەسى لەڭگىر قالاسى اكىمدىگىنىڭ 2001 جىلعى 6 شىلدەدەگى №215 شەشىمىمەن ماريا بيشىمبايەۆا كوشەسى بولىپ قايتا اتالدى"، - دەپ جازىلعان حابارلامادا.

دەگەنمەن بۇل ەسىمنىڭ ايەلىن ءولتىردى دەپ ايىپتالىپ وتىرعان قۋاندىق بيشىمبايەۆقا ەشقانداي قاتىسى جوق بولىپ شىقتى.

"ماريا بيشىمبايەۆا - وبلىس، اۋداننىڭ دامۋىنا ۇلكەن ۇلەس قوسقان، بىرنەشە جىل قازىعۇرت اۋىلدىق كەڭەسىڭ باسقارعان، ەلگە ەڭبەگى سىڭگەن ازامات.

ول 1940 جىلى بادام اۋىلدىق سوۆەتىنىڭ حاتشىسى، 1947 جىلدان ءتورايىمى بولىپ سايلاندى. 1949 جىلى التى ۋاق اۋىلدىڭ كەڭەستەرى بىرىگىپ، قازىعۇرت اۋىلدىق كەڭەسى بولىپ قۇرىلدى. ماريا بيشىمبايەۆا وسى اۋىلدىق كەڭەستىڭ 45 جىل بويى ءتورايىمى بولدى. م.بيشىمبايەۆا باسقارعان قازىعۇرت اۋىلدىق كەڭەسى رەسپۋبليكادا كوپتەگەن جىل "ەڭ ۇزدىك اۋىلدىق كەڭەس" بولىپ تانىلعان. اۋىلدىق، وبلىستىق كەڭەستەردىڭ دەپۋتاتى، قازاقستان كومپارتياسى XIII سەزىنىڭ دەلەگاتى بولىپ سايلانعان.

ەرەن ەڭبەكتەرى ءۇشىن ول "قىزىل تۋ" وردەنىمەن، "ەڭبەكتەگى ەرلىگى ءۇشىن"، "ەڭبەكتە ۇزدىك شىققان ءۇشىن" مەدالدارىمەن ناگرادتالدى"، - دەدى وبلىس اكىمدىگى وكىلدەرى.