ەلىمىزدە جىل باسىنان بەرى بالالاردىڭ تەرەزەدەن قۇلاۋىنا بايلانىستى 179 وقيعا تىركەلىپ، ونىڭ 32ء-سى قايعىلى وقيعامەن اياقتالدى. وقيعالاردىڭ نەگىزگى سەبەبى - اتا-انالاردىڭ بالالاردى قاراۋسىز قالدىرۋى. بۇل تۋرالى تۇركىستان وبلىستىق تجد توتەنشە جاعدايلاردىڭ الدىن الۋ باسقارماسى باستىعىنىڭ مىندەتىن اتقارۋشى اسىلبەك اقىلبەك ۇلى مالىمدەدى،- دەپ حابارلايدى Dalanews.kz
"وبلىس اۋماعىندا جىل باسىنان بەرى بالانىڭ تەرەزەدەن قۇلاۋى بويىنشا 1 جاعداي تىركەلىپ، 6 ايلىق نارەستە اۋىر جاراقاتتان كوز جۇمدى. قازىرگى تاڭدا تۇركىستان وبلىسى اۋماعىندا 737 كوپقاباتتى تۇرعىن ءۇي بار. قايعىلى جاعدايلاردىڭ الدىن الۋ ماقساتىندا دەپارتامەنتتىڭ ۇيىمداستىرۋىمەن بالالاردىڭ قاۋىپسىزدىگى بويىنشا ءبىرشاما ءىس-شارالار اتقارىلۋدا. اتاپ ايتقاندا، "بالا قاۋىپسىزدىگى – باستى ماقساتىمىز" تاقىرىبىندا تۇركىستان قالاسىنداعى ساياباقتاردا جاستار مەن بالالاردى تەرەزە الدىنداعى قاۋىپسىزدىك ەرەجەلەرىمەن تانىستىرۋ ماقساتىندا اۋقىمدى اكسيا ءوتتى. شاراعا 800-گە جۋىق ادام قاتىستى. سونىمەن قاتار، جەرگىلىكتى اتقارۋشى ورگاندار مەن ەرىكتىلەردى تارتا وتىرىپ، وبلىس اۋماعىنداعى كوپقاباتتى ۇيلەردىڭ تۇرعىندارىنا تەرەزە الدىنداعى قاراپايىم قاۋىپسىزدىك ەرەجەلەردى تانىستىرىپ، الەۋمەتتىك وسال توپتاعى وتباسىلاردىڭ تۇرعىن ۇيلەرىنىڭ تەرەزەلەرىنە ارنايى بەكىتپەلەر ورناتىلدى. بۇل باعىتتاعى جۇمىستار ءوز جالعاسىن تاباتىن بولادى"،-دەدى سپيكەر.
