تاياۋ ۋاقىتتا تۇركىستان مەن الماتى قالاسىنىڭ اراسىندا جۇردەك پويىز باعىتى اشىلادى. بۇل تۋرالى بۇگىن تۇركىستان وبلىسى اكىمدىگىندە وتكەن كەزدەسۋدە  بەلگىلى بولدى.

شەجىرەلى شاھارعا ارنايى اتباسىن بۇرعان «تۇران ەكسپرەسس» كومپانياسى مەن «تۇران.تۆ» تەلەارناسىنىڭ باس ديرەكتورى رومان بوتابەكوۆ الدىمەن وبلىس اكىمى جانسەيىت تۇيمەبايەۆتىڭ قابىلداۋىندا بولىپ، ءتۋريزمدى دامىتۋ باعىتىندا پىكىر الماستى. وبلىس اكىمى تاراپىنان قولداۋعا يە بولعان كومپانيا باسشىسى ءوڭىردىڭ ءتۋريزمىن دامىتۋعا ۇلەس قوساتىنىن ايتتى.

– تۇركىستاننىڭ وبلىس ورتالىعى اتانعانىن قۋانىشپەن قابىلدادىم. ءوزىم كەنتاۋدا تۋىپ-وسكەم. سوندىقتان تۋعان جەرگە قىزمەت ەتۋگە، تۋريستىك الەۋەتىن كوتەرۋگە ۇلەسىمدى قوسسام دەگەن نيەتپەن كەلىپ وتىرمىن. قاراشا ايىنان باستاپ الماتى مەن تۇركىستان قالالارى اراسىندا تۋريستىك پويىز باعىتىن اشپاقشىمىز. ەكىنشىدەن، ءوزىم باسقاراتىن «تۇران.تۆ» تەلەارناسى ارقىلى تۇركىستان وبلىسى مەن تۇركىستان قالاسىنىڭ كورىكتى، شەجىرەلى ورىندارى تۋرالى بەينەماتەريالدار، رەپورتاجدار، فيلمدەر ازىرلەيمىز. وسى جۇمىستارىمىز ارقىلى تۇركىستاننىڭ ءتۋريزمىن دامىتۋعا ۇلەس قوسامىز دەگەن ويدامىن. سەبەبى، ءقازىر ساياحاتشىلارعا كەرەگى – جايلى كولىك پەن قولجەتىمدى اقپارات، – دەيدى رومان بوتابەكوۆ.

وسىعان وراي، بۇگىن «تۇران ەكسپرەسس» كومپانياسى مەن تۇركىستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسى، تۋريزم جانە سىرتقى بايلانىستار باسقارماسى جانە ىشكى ساياسات باسقارماسى اراسىندا ارىپتەستىك جانە ىسكەرلىك بايلانىس جونىندە مەموراندۋمعا قول قويىلدى. سونىمەن قاتار، اتالعان باسقارمالار مەن «تۇران.تۆ» تەلەارناسى اراسىندا دا مەموراندۋم جاسالدى.

اتالعان پويىز الماتىدان جۇما كۇنى شىعىپ، جەكسەنبى كۇنى كەرى قايتادى. ساياحاتشى جولاۋشىلار قوناق ءۇي ىزدەمەي، وسى پويىزدا تىنىعىپ، تۇركىستاندى ەكى كۇن ارالايدى. ازىرشە بۇل پويىز اپتاسىنا 4 رەت جۇرگىزىلسە، كەلەشەكتە كۇن سايىن ساپارعا شىعادى دەگەن جوسپار بار.  سونىمەن قاتار، «تۇران ەكسپرەسس» كومپانياسى تۇركىستان مەن شىمكەنت قالالارى اراسىندا كۇن سايىن قاتىنايتىن پويىز باعىتىن اشۋدى دا قولعا الماقشى. اكىمدىكتەر تاراپىنان قولداۋ تاپسا، بۇل جوسپار دا جۇزەگە اسپاق. بۇگىندە «تۇران ەكسپرەسس» كومپانياسىنىڭ يەلىگىندە زامان تالابىنا ساي 100-دەن استام ۆاگون بار. جولاۋشى تاسىمالىنداعى كوشباسشىلاردىڭ ءبىرى. ال، «تۇران.تۆ» —تەلەارناسى ەلىمىزدەگى تۋريزم مەن اڭشىلىقتى، بالىق شارۋاشىلىعى مەن بەلسەندى ءومىر سالتىن ناسيحاتتايتىن جالعىز سالالىق تەلەارنا.                                وسى مەموراندۋمدار ارقىلى تۇركىستان قالاسىنىڭ تۋريستىك الەۋەتى كوتەرىلەدى دەگەن بولجام بار.

 

تۇركىستان وبلىسى اكىمىنىڭ باسپا ءسوز قىزمەتى