ماقتاارال اۋدانى تۇرعىندارى ءۇشىن قوعامدىق كولىكتەر – كۇندەلىكتى تۇرمىستىڭ ماڭىزدى بولىگى. اۋداننىڭ حالىق تىعىز ورنالاسقان ەلدى مەكەندەرىن ءوزارا بايلانىستىراتىن باعىتتاردىڭ ءبىرى – «مىرزاكەنت – اتاكەنت – مىرزاكەنت» مارشرۋتى بولىپ سانالادى. بۇل باعىتتا 2021 جىلدىڭ 1 ماۋسىمىنان باستاپ تاسىمالداۋشى مەردىگەر «SAR avto» جشس-گى تۇراقتى تۇردە قىزمەت كورسەتىپ كەلەدى، - دەپ حابارلايدى Dalanews.kz
دەگەنمەن، وسى ۋاقىتقا دەيىن قىزمەت كورسەتكەن قوعامدىق كولىكتەردىڭ تەحنيكالىق جاعدايى مەن جايلىلىعى زاماناۋي تالاپتارعا تولىقتاي ساي بولماعانى بەلگىلى. بۇل ماسەلە اۋدان اكىمدىگى تاراپىنان نازاردان تىس قالمادى. اۋدان اكىمى باحىت اسانوۆتىڭ تاپسىرماسىنا سايكەس، تۇرعىندارعا جايلى ءارى ءقاۋىپسىز كولىك قىزمەتىن ۇسىنۋ ماقساتىندا قوعامدىق كولىك پاركىن جاڭارتۋ بويىنشا ناقتى شارالار قولعا الىندى. وسىعان وراي، قازاقستان رەسپۋبليكاسى ۇكىمەتىنىڭ 2021 جىلعى 2 قىركۇيەكتەگى №604 قاۋلىسىنا سايكەس، «ونەركاسىپتى دامىتۋ قورى» اكسيونەرلىك قوعامىنىڭ جەڭىلدەتىلگەن ليزينگتىك قارجىلاندىرۋى ارقىلى «SAR avto» جشس-نە 7 جىل مەرزىمگە جاڭا تەحنيكا ساتىپ الۋعا مۇمكىندىك بەرىلدى. ناتيجەسىندە، اۋدانعا وتاندىق وندىرىستەن شىققان، زاماناۋي تالاپتارعا ساي جابدىقتالعان، سەمەي اۆتوزاۆودىندا قۇراستىرىلعان گازەل نەكست ماركالى 4 دانا جاڭا ميكرواۆتوبۋس جەتكىزىلدى.
بۇگىن اۋدان اكىمى مىندەتىن اتقارۋشى نۇربول ساتتاروۆ، اۋداندىق ءماسليحاتتىڭ حاتشىسى ءقادىر سارسەكبايەۆتار جاڭادان كەلگەن قوعامدىق كولىكتەردىڭ ءىشىن ارنايى قاراپ شىعىپ، كولىكتىڭ كىلتتەرىن جۇرگىزۋشىلەرىنە تابىستادى. بۇل كولىكتەر – زاماناۋي كونديسيونەرلىك جۇيەمەن (مۇزداتقىشپەن) جابدىقتالعان، جولاۋشىلار ءۇشىن ىڭعايلى ورىندىقتارمەن، قاۋىپسىزدىك بەلدىكتەرىمەن جانە ساپالى جەلدەتۋ جۇيەسىمەن قامتاماسىز ەتىلگەن. سونىمەن قاتار بۇل كولىكتەردىڭ ەكولوگيالىق تازالىعى مەن وتىن ۇنەمدەۋشى سيپاتتارى دا ارتىقشىلىقتاردىڭ ءبىرى بولىپ سانالادى.
اۋدان اكىمدىگى مەن مەردىگەر كومپانيا تىعىز ىنتىماقتاستىعىنىڭ ارقاسىندا جۇزەگە اسقان بۇل جوبا – ماقتاارال تۇرعىندارىنىڭ ءومىر ساپاسىن ارتتىرۋ جولىنداعى ماڭىزدى قادامداردىڭ ءبىرى. جاڭارتىلعان كولىكتەر ءوز باعىتى بويىنشا كەستەگە سايكەس كۇندەلىكتى قاتىناپ، تۇرعىندارعا ساپالى قىزمەت كورسەتەتىن بولادى. بۇل – ەل پرەزيدەنتىنىڭ «حالىق ۇنىنە قۇلاق اساتىن مەملەكەت» تۇجىرىمداماسىنا نەگىزدەلگەن الەۋمەتتىك باعىتتاعى ساياساتتىڭ ناقتى كورىنىسى.
