مەملەكەت باسشىسى قاسىم-جومارت توقايەۆتىڭ «ق ر اۋىلدىق ايماقتارىن دامىتۋدىڭ 2023-2027 جىلدارعا ارنالعان تۇجىرىمداماسى تۋرالى» جارلىعى نەگىزىندە اۋىل تۇرعىندارىنىڭ ءال-اۋقاتىن جاقسارتۋعا، پروبلەمالارىن جەدەل شەشۋگە، اۋىلداردىڭ ەكونوميكاسىن كوتەرۋگە مۇمكىندىك بەرۋ ماقساتىندا «اۋىل اماناتى» جوباسى قولعا الىنعان بولاتىن، – دەپ حابارلايدى Dalanews.kz.
تۇركىستان وبلىسىندا اتالعان باعدارلاما اياسىندا اۋقىمدى جۇمىستار اتقارىلدى. وتكەن جىلى اتقارىلعان جۇمىستاردىڭ قورىتىندىسى جانە بيىلعا قويىلاتىن تالاپتار مەن وزگەرىستەر جايىندا وبلىس اكىمىنىڭ ورىنباسارى ەرمەك كەنجەحان ۇلىنىڭ توراعالىعىمەن وتكەن جيىندا كەڭىنەن تالقىلاندى. جيىنعا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىربايەۆا، اۋىل شارۋاشىلىعى باسقارماسىنىڭ قىزمەتكەرلەرى، اۋدان، قالا اكىمنىڭ ورىنباسارلارى مەن اۋىل شارۋاشىلىعى ءبولىمنىڭ باسشىلارى، جوباعا قاتىساتىن اۋىلدىق وكرۋگتەردىڭ اكىمدەرى، مانساپ ورتالىقتارىنىڭ ءبولىم باسشىلارى، «تۇركىستان اكك» اق جانە «ىرىس مقۇ» وكىلدەرى قاتىستى.
تۇركىستان وبلىسى اكىمىنىڭ ورىنباسارى ەرمەك كەنجەحان ۇلى «اۋىل اماناتى» جوباسىنىڭ اۋىلداردا جۇزەگە اسىرۋ ناتيجەلەرىنە توقتالىپ، جۇكتەلگەن مىندەتتەردى ءتيىستى دەڭگەيدە ورىنداماعان اۋىل اكىمدەرىن سىنعا الدى. بيىل نەسيە الۋشىلارعا قويىلاتىن تالاپتارعا توقتالىپ، ءتيىمدى ۇسىنىستار ايتتى.
– وتكەن جىلى جۇيەلى جۇمىستار جۇرگىزىلدى. دەگەنمەن، كەمشىلىكتەر دە بار. نەسيە الۋشىلارعا دا تالاپتار كوپ بولمادى. وسى جىلى ەڭ باستى كورسەتكىش – جاڭا جۇمىس ورىندارىن اشۋ. اۋىلداردا تەك مال شارۋاشىلىعىن عانا ەمەس، بالىق جانە قۇس شارۋاشىلىقتارىن دامىتۋ كەرەك. باعدارلامامەن ءبىر اۋداننان ءتورت اۋىل قارجىلاندىرىلسا، 4 ءتۇرلى ءونىم ءوندىرۋدى قولعا العان ءجون. ءار اۋىل ءوز مۇمكىندىگى مەن بەيىمدىلىگىنە قاراي باعىت تاڭداسىن. اۋىل اكىمدەرى، ۇيىمداستىرۋ جانە ءتۇسىندىرۋ جۇمىستارىن دۇرىس جۇرگىزىڭىزدەر. مەرزىمىنەن كەشىككەن اۋىلدارعا قارجى بولىنبەيدى. وتكەن جىلعى ورىن العان كەمشىلىكتەر قايتالانباسىن، – دەدى وبلىس اكىمىنىڭ ورىنباسارى.
تۇركىستان وبلىسىندا وتكەن جىلى وبلىستىق اۋىل شارۋاشىلىعى باسقارماسىنىڭ ۇيىمداستىرۋىمەن «تۇركىستان الەۋمەتتىك-كاسىپكەرلىك كورپوراسياسى» اق مەن «ىرىس» ميكروقارجى ۇيىمى» ج ش س بىرلەسىپ، اتالعان باعدارلامانى ىسكە اسىرۋ جۇمىستارىن جۇزەگە اسىردى. بىلتىر رەسپۋبليكالىق بيۋدجەتتەن تۇركىستان وبلىسىنا باعدارلاما اياسىندا 19،7 ملرد تەڭگە قارجى ءبولىندى. بولىنگەن قارجىعا 3220 نەسيە الۋشىنى قارجىلاندىرىپ، 3413 جاڭا جۇمىس ورنىن اشۋ مىندەتتەلدى. 2023 جىلدىڭ سوڭىنا دەيىن اتالعان قاراجات تولىق يگەرىلىپ، 3 215 سوڭعى نەسيە الۋشى قارجىلاندىرىلدى. ناتيجەسىندە 3517 جاڭا جۇمىس ورنى اشىلدى. ياعني، بەلگىلەنگەن جوسپار 103 پايىزعا ورىندالعان.
باعدارلاما اياسىندا ۇلەستىرىلگەن قارجىنىڭ ماقساتتى جۇمسالۋىن تەكسەرۋ ماقساتىندا «ىرىس» مقۇ» ج ش س مونيتورينگ ءبولىمىنىڭ مەنەدجەرلەرى مونيتورينگ جۇمىستارىن جۇرگىزدى. ءبىرقاتار كەمشىلىكتەر انىقتالىپ، نەسيە قاراجاتىن ماقساتتى جۇمساماعان نەسيە الۋشىلارعا كەمشىلىكتەردى جويۋ ءۇشىن قوسىمشا 1 اي مەرزىم بەرىلدى. بەلگىلەنگەن مەرزىمدە كەمشىلىكتەردى جويماعان 6 نەسيە الۋشىنىڭ ىس-ارەكەتى نەسيە كوميتەتىندە قارالىپ، ءتيىستى ءىس-شارالار جۇرگىزىلۋدە.
بيىل 62 اۋىلدىق وكرۋگ جوباعا قاتىسىپ، 62 كوپەراتيۆ قۇرىلادى. ناتيجەسىندە 2640 جوبا جۇزەگە اسىرىلىپ، 4416 جاڭا جۇمىس ورنى اشىلادى دەپ كۇتىلۋدە.
