تۇركىستان وبلىسى اكىمى دارحان ساتىبالدى تۇركىستانداعى حالىقارالىق اۋەجايدى دامىتۋدىڭ جاڭا جوبالارىن دايىنداۋدى تاپسىردى. وبلىس ورتالىعىنا قاتىنايتىن باعىتتاردى كوبەيتىپ، تۋريزممەن ۇيلەستىرۋدى مىندەتتەدى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
اۋەجايدىڭ لوگيستيكالىق الەۋەتىن دە ارتتىرىپ، جۇك تاسىمالىن ۇلعايتۋ ماڭىزدىلىعىنا توقتالدى. اۋە جۇك تاسىمالىن ىلگەرىلەتۋ – ەكسپورتتى ۇلعايتۋعا سەپ. اكىم توراعالىعىمەن وتكەن جينالىستا تۇركىستانداعى حالىقارالىق اۋەجايدى دامىتۋ، الەۋەتىن كوتەرۋ جولدارى تالقىلاندى. وندا اۋەجايدى دامىتۋ، تابىسى مەن جولاۋشىلار اعىنىن ارتتىرۋعا باعىتتالعان جۇمىستار سارالاندى. وبلىس اكىمى زامانۋاي اۋەجايدىڭ مۇمكىندىگى مەن الەۋەتى ءالى دە تولىق قولدانىلماي وتىرعانىن ايتىپ، جاۋاپتى تۇرعالارعا تاپسىرما بەردى.
دامۋدىڭ نەگىزگى باعىتتارىنىڭ ءبىرى – اۋەجاي اۋماعىندا مۋلتي-مودالدى لوگيستيكالىق حاب قۇرۋ.
– ءوڭىردىڭ الەۋمەتتىك - ەكونوميكالىق دامۋىنا وڭ اسەر ەتەتىن جۇيەلى جۇمىس كەرەك. اۋەجاي دا جاھاندانۋ ۇردىسىنەن قالماۋى ءتيىس. ءقازىر تاۋاردى جەدەل جەتكىزۋ الەمدىك تەندەنسياعا اينالدى. ترانزيتتىك ءدالىزدى دامىتۋ وزەكتى. سوندىقتان وزگە ەلدەردىڭ تاجىريبەسىمەن تانىسىڭىزدار. سالانى ىلگەرىلەتۋ ارقىلى بيزنەستى وركەندەتۋگە بولادى. شەتەلدىڭ ءىرى اۋە كومپانيالارىمەن بايلانىستى نىعايتۋ كەرەك. وسىعان دەيىنگى بەرىلگەن تاپسىرمالاردىڭ ورىندالۋى ءالى دە ءالسىز. اۋەجاي جۇمىسىن تۋريزم سالاسىمەن بايلانىستىرا دامىتقان ءجون. ءۇندىستان، كورەيا، مالايزيا، تۇركيا، رەسەي، قىتايعا اۋە رەيستەرىن كوبەيتىپ، ساياحاتشىلاردى تارتۋ باعىتى دا اقساپ تۇر. اۋەجايدىڭ لوگيستيكالىق الەۋەتىن دە ارتتىرىپ، جۇك تاسىمالىن ۇلعايتۋ قاجەت، – دەدى دارحان ساتىبالدى.
تۇركىستان قالاسىنداعى حالىقارالىق اۋەجاي تاۋەلسىزدىك جىلدارىندا جاڭادان سالىنعان ەلىمىزدەگى العاشقى اۋە ايلاعى. ستراتەگيالىق ماڭىزى بار نىسان زاماناۋي ۇلگىدەگى يننوۆاسيالىق جانە تەحنولوگيالىق تالاپتارعا ساي. جىلىنا 3 ملن. جولاۋشىعا قىزمەت كورسەتە الادى.
