بىشكەكتە تۇركى مەملەكەتتەرى ۇيىمىنا قاتىسۋشى ەلدەردىڭ ەكونوميكا جانە ساۋدا مينيسترلەرىنىڭ 13ء-شى كەزدەسۋى ءوتتى، دەپ حابارلايدى Dalanews.kz.
وعان قازاقستان پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ، سونداي-اق ازەربايجان، تۇركيا، قىرعىزستان، وزبەكستان جانە ماجارستاننان كەلگەن دەلەگاسيالار قاتىستى.
كەزدەسۋدىڭ باستى تاقىرىبى تمۇ-عا مۇشە مەملەكەتتەردىڭ ەكونوميكالىق دامۋى مەن ىنتىماقتاستىعىن ودان ءار نىعايتۋ ماسەلەلەرى بولدى.
ۆيسە-پرەمەر قازاقستان تۇركى ينتەگراسياسىنىڭ دامۋىنا ەرەكشە ءمان بەرەتىنىن جانە باۋىرلاس مەملەكەتتەردىڭ باستامالارى مەن سىندارلى ۇسىنىستارىن ءارقاشان قۇپتايتىنىن اتاپ ءوتتى.
"تمۇ اياسىندا قۇرىلعان تۇركى ينۆەستيسيالىق قورى ەكونوميكالىق جانە ينۆەستيسيالىق ىنتىماقتاستىقتى كەڭەيتۋگە، بىرلەسكەن ينۆەستيسيالىق جوبالاردى ىسكە اسىرۋعا، ەلدەرىمىزدىڭ قارقىندى ءوسۋى مەن وركەندەۋى ءۇشىن كاپيتالداردى، تەحنولوگيالار مەن تالانتتاردى تارتۋعا دەگەن ورتاق ۇمتىلىستى ايعاقتايدى"، — دەدى نۇرلان بايبازاروۆ.
تمۇ ەلدەرىنىڭ بارلىق مينيسترلەرى قازاقستاننىڭ تمۇ جاسىل قارجى جونىندەگى كەڭەسىن، سونداي-اق تمۇ-عا مۇشە مەملەكەتتەردىڭ ورتالىق (ۇلتتىق) بانكتەر كەڭەسىن قۇرۋ تۋرالى باستامالارىن قولدادى.
تمۇ ەكونوميكا جانە ساۋدا مينيسترلەرىنىڭ كەلەسى كەزدەسۋى تۇركىستاندا وتەدى. وندا قازاقستاننىڭ بارلىق تمۇ ەلدەرى قولداعان تاعى ءبىر باستاماسى "TURAN" ارنايى ەكونوميكالىق ايماعىن اشۋ جوسپارلانىپ وتىر.
ەستەرىڭىزگە سالا كەتسەك، تۇركىتىلدەس مەملەكەتتەردىڭ ىنتىماقتاستىق كەڭەسى 2009 جىلعى 3 قازاندا قۇرىلدى. 2021 جىلى كەڭەس تۇركى مەملەكەتتەرىنىڭ ۇيىمى بولىپ قايتا قۇرىلدى. 2024 جىلدىڭ 8 ايىنىڭ قورىتىندىسى بويىنشا قازاقستان مەن تمۇ ەلدەرى اراسىنداعى ءوزارا ساۋدا كورسەتكىشى 7،2 ملرد دوللاردى قۇرادى. 2024 جىلى تمۇ-نىڭ اياسىندا تۇركى ينۆەستيسيالىق قورى ياعني، تۇركى الەمى ەلدەرى ەكونوميكالىق ينتەگراسياسىنىڭ العاشقى بىرلەسكەن قارجى ينستيتۋتى قۇرىلدى. تۇركى ينتەگراسياسى ترانزيتتىك-كولىك ماسەلەلەرىنەن باستاپ، ەكونوميكا، ەكولوگيا، عىلىم، ءبىلىم، ونەر، تۋريزم، سپورت پەن گۋمانيتارلىق سالاعا دەيىنگى ىنتىماقتاستىقتىڭ كەڭ اۋقىمىن قامتيدى.
قازىرگى ۋاقىتتا ۇيىمعا بەس مۇشە جانە ەكى باقىلاۋشى مەملەكەت كىرگەن. وعان مۇشە مەملەكەتتەر: ازەربايجان، قازاقستان، قىرعىزستان، تۇركيا، وزبەكستان. باقىلاۋشى مەملەكەتتەر: ماجارستان، تۇرىكمەنستان.
