«باس پروكۋراتۋرانىڭ بىرنەشە مارتە جاساعان ەسكەرتۋىنە قاراماستان، كەشە ازاماتتاردىڭ ءبىر بولىگى تىيىم سالىنعان ەكسترەميستىك ۇيىم ۇسىنعان ورىنداردا سانكسيالانباعان ميتينگ وتكىزۋگە تىرىستى. سول ءۇشىن پوليسيا قوعامدىق ءتارتىپتىڭ بۇزىلۋىن الدىن الۋ شارالارىن جۇرگىزدى.
وسىلايشا، ىشكى ىستەر ورگاندارىنا، پوليسيا ورگاندارىنا 80-گە تارتا ازامات جەتكىزىلدى. پروفيلاكتيكالىق جۇمىستاردان كەيىن ءبارى ۇيىنە جىبەرىلدى.
ءتورت ادام اكىمشىلىك جاۋاپكەرشىلىككە تارتىلدى – ءبىرى ايىپپۇل ارقالاسا، ۇشەۋى قاماققا الىندى. ولاردىڭ ەكەۋى پوليسيا قىزمەتكەرلەرىنە قارسىلىق كورسەتسە، بىرەۋى سانكسيالانباعان ميتينگ ۇيىمداستىرعانى ءۇشىن ۇستالدى»، - دەدى ەرلان تۇرعىمبايەۆ بۇگىن ۇكىمەت وتىرىسىنان كەيىن تىلشىلەرگە.
مينيستر ءوز سوزىندە ازاماتتار ءۇش ساعاتتان ارتىق ۇستالماعانىن ايتادى.
«بىزدە بەيبىت جيىندار، شەرۋلەر مەن دەمونستراسيالار تۋرالى زاڭ بار. ول جەردە تالاپتار ناقتى جازىلعان. بەيبىت جيىن وتكىزگىسى كەلەتىن ازاماتتار اتقارۋشى بيلىك ورگاندارىنا ءوتىنىم بەرىپ، رۇقسات الىپ، ورىنى، ۋاقىتى مەن كەلەتىن ازاماتتار سانىن ايقىنداۋى كەرەك. بۇل جاعدايدا ول شارالار جاسالماعان، ءوتىنىم بەرىلمەگەن. ونىڭ ۇستىنە باس پروكۋراتۋرانىڭ 1 ناۋرىزعا بايلانىستى ەسكەرتپەسى بار. سوندىقتان جيىن زاڭسىز بولدى»، - دەدى ول.
ەسكە سالايىق، 28 اقپان كۇنى ق ر باس پروكۋراتۋراسى قازاقستاندىقتارعا ۇندەۋ تاستاپ، زاڭسىز ميتينگىلەرگە قاتىسپاۋعا شاقىرعان ەدى.
«الەۋمەتتىك جەلىلەردە زاڭسىز نارازىلىق اكسيالارىن وتكىزۋگە شاقىرۋلار تاراتىلۋدا. بۇل رەتتە شىندىققا جاناسپايتىن، ونىڭ ىشىندە الەۋمەتتىك جانە ۇلتتىق الاۋىزدىق پەن ارازدىقتى قوزدىرۋ بەلگىلەرىمەن اقپاراتتار ورنالاستىرىلۋدا. زاڭسىز كوپشىلىك ءىس-شارالاردى ۇيىمداستىرۋ جانە وعان قاتىسۋ اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا جاۋاپتىلىققا اكەپ سوقتىراتىنىن ەسكە سالامىز. وسى ارەكەتتەرمەن ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرىلگەن جاعدايدا قىلمىستىق كودەكستىڭ 400-بابى بويىنشا جاۋاپتىلىق كوزدەلگەن.الەۋمەتتىك جانە ۇلتتىق ارازدىقتى قوزدىرۋ، كورىنەۋ جالعان اقپارات تاراتۋعا جاريا تۇردە شاقىرۋ زاڭمەن تىيىم سالىنعان جانە مۇنداي ارەكەتتەر قىلمىستىق تارتىپتە قۋدالاناتىنىنا نازار اۋدارامىز (قك 174 جانە 274-باپتارى)»، - دەلىنگەن مالىمدەمەدە.
