– كەشە تىركەلمەگەن دەمپارتيانىڭ جەتەكشىسىمىن دەپ جۇرگەن جانبولات مامايدىڭ سوت شەشىمىن ورىنداماعانى ءۇشىن ونىڭ كولىك جۇرگىزۋ قۇقىعىن سوت ورىنداۋشىسىنىڭ ۇسىنىسى بويىنشا شەكتەۋ زاڭدى ەمەس دەپ جازعان الەۋمەتتىك جەلىدەگى پوستىمەن تانىستىم.
ەسكەرتە كەتەيىن، وسى ماسەلەگە قاتىستى سوت پروسەسى ءالى وتكەن جوق. مامايدىڭ اقپاراتىنا سەنسەك سوت 16 قاراشا كۇنى وتەدى ەكەن. جالپى وسى جەردە ماماي سوت ورىنداۋشىسىنىڭ ارەكەتىن زاڭسىز دەپ جار سالۋدا. ءبىراق بۇل تۇبەگەيلى قاتە پايىم. اتقارۋشىلىق iس جۇرگiزۋ جانە سوت ورىنداۋشىلارىنىڭ مارتەبەسi تۋرالى زاڭدا سوت ورىنداۋشىسىنىڭ وسى جاعدايداعى ىس-ارەكەتى تولىقتاي بەلگىلەنگەن، – دەپ جازدى اقىلباي.
زاڭگەردىڭ سوزىنشە، سوت ۇسىنىستى زاڭنامادا بەلگىلەنگەن تارتىپپەن قارايدى. ءارى بۇل پروسەستە زاڭ بۇزۋشىلىق تۋرالى بىردە-بىر فاكتى جوق .سونداي-اق سوت ورىنداۋشىسىنىڭ نەلىكتەن مامايدىڭ كولىك جۇرگىزۋ قۇقىعىن شەكتەۋ بويىنشا سوتقا جۇگىنگەنىن ءتۇسىندىردى.
– مامايدىڭ بايبەكتەن سوتتا جەڭىلگەنىن بىلەسىزدەر. ماماي سول سوت شەشىمىن ءالى دە تولىعىمەن ورىنداعان جوق. اپەللياسيا وتكەننەن كەيىن 3 ايدان استام ۋاقىت وتسە دە، ماماي بايبەك تۋرالى جالعان دەپ تانىلعان ماتەريالداردى جوققا شىعارماي، ورنالاستىرعان جەرلەرىنەن جويعان جوق. بۇل قۇقىقتىق مەملەكەتتە ورىندالۋى ءتيىس زاڭدى پروسەسس. ءبىراق ءالى كۇنگە دەيىن سوت شەشىمى ورىندالعان جوق. وسى ورايدا سوت ورىنداۋشىسى وزىنە زاڭمەن بەلگىلەنگەن وكىلەتتىگىنە سايكەس ارەكەت ەتۋدە، – دەپ قوستى ول.
سونىمەن بىرگە زاڭگەر جاۋاپكەرلەر سوت شەشىمىن ورىنداماعان جاعدايدا ماجبۇرلەپ ورىنداتۋدىڭ باسقا قادامدارى بارىن ەسكەرتتى. ماسەلەن، سوت شەشىمىن ءوز ەركىمەن ورىنداۋ ۋاقىتى 6 ايدان اسىپ كەتەتىن بولسا، وندا سوت ورىنداۋشىسى قىلمىستىق كودەكس باپتارىنا جۇگىنە وتىرىپ، مامايدى جالپى سانى 800 ساعات بولاتىن قوعامدىق جۇمىستارعا تارتۋ، ءتىپتى 3 جىلعا دەيىن باس بوستاندىعىن شەكتەۋ، بولماسا 3 جىلعا دەيىن باس بوستاندىعىنان ايىرۋ تۋرالى دا ۇسىنىس بەرە الادى.
– مۇنىڭ ءبارى، ماماي بولسىن، تاعى باسقا ازامات بولسىن، سول زاڭدى سوت شەشىمىن ماجبۇرلەپ ورىنداتۋ ءۇشىن زاڭدا قاراستىرىلعان بارلىعىنا بىردەي تالاپتار. مۇنداي قادامدار سوت شەشىمى تولىق ورىندالعانعا دەيىن جالعاسا بەرەدى. ماماي بولسا ءوزىن وپپوزيسيونەر ساناپ، قۇقىق قورعاۋدا سالاسىندا ءوزىن بىلگىش كورسەتىپ، بۇكىل قازاقستانعا تەك بوس اڭگىمە تاراتۋدا. قۇقىقتىق مەملەكەت قۇرايىق دەيدى، ءبىراق ءوزى زاڭعا باعىنبايدى. بۇل نەتكەن ەكىجۇزدىلىك؟ – دەپ جازدى سەرىك اقىلباي.
