«استانا ەكسپو-2017» ۇلتتىق كومپانياسى اق جانە «ترانستەلەكوم» اق سەرىكتەستىك مەموراندۋىنا قول قويدى. ەندىگى «ترانستەلەكوم» كومپانياسى – «كورمە سەرىكتەسى» مارتەبەسىنە يە. «ترانستەلەكوم» – ەلىمىزدىڭ ءىرى ءىت جانە بايلانىس وپەراتورلارىنىڭ ءبىرى. ول – تەلەكوممۋنيكاسيا، اقپاراتتىق كوممۋنيكاسيا سالاسىندا كەڭ اۋقىمدى قىزمەت كورسەتە الاتىن بىرەگەي كومپانيا. سونداي-اق ءىت ينتەگراتور بولىپ تابىلادى.  

«قازاقستاندىق كومپانيانىڭ يننوۆاسيالىق جوبالاردى ءساتتى جۇزەگە اسىرىپ جاتقاندىعىن كورۋ – كوڭىل قۋانتادى. ترانستەلەكومنىڭ اۋقىمدى فيليالدىق جۇيەسى بار، بۇل بۇكىل قازاقستان كولەمىندە ەكسپو كورمەسىن كەڭ تاراۋىنا ىقپال ەتەدى. سوندىقتان ءبىزدىڭ جوبامىزعا ترانستەلەكوم سىندى الدىڭعى قاتارلى كومپانيالاردىڭ قاتىسۋى – ەلىمىزدىڭ بولاشاققا دەگەن سەنىمىن نىعايتىپ، ەلباسى تاپسىرماسىنىڭ ورىندالۋىن قامتاماسىز ەتەدى»، – دەدى ءوز سوزىندە احمەتجان ەسىموۆ.

«حالىقارالىق مامانداندىرىلعان ەكسپو-2017 كورمەسىنىڭ رەسمي «ءىت سەرىكتەسى» بولۋ – «ترانستەلەكوم» ءۇشىن ۇلكەن مارتەبە. البەتتە، ەكسپو-2017 – قازاقستان ءۇشىن ماڭىزدى شارالاردىڭ ءبىرى. بۇگىنگى تاڭدا «ترانستەلەكوم» اق «استانا ەكسپو-2017» ۇلتتىق كومپانياسىمەن بىرلەسىپ جۇمىس ىستەۋدە. ءبىز ءىس-شارانىڭ ءمانى مەن ماڭىزىن تۇسىنە وتىرىپ، وعان ۇلكەن جاۋاپكەرشىلىكپەن قارايمىز»، – دەدى كومپانيا پرەزيدەنتى داۋرەن پىشەمبايەۆ.

 الداعى ۋاقىتتا «استانا ەكسپو-2017» ۇلتتىق كومپانياسى «ترانستەلەكوم» اق حالىقارالىق كورمەنى وتكىزۋ باعىتىندا بىرلەسكەن ءىس-شارالار وتكىزەتىن بولادى.

سونداي-اق، «ترانستەلەكوم» اق «ەكسپو-2017» كورمەسى بارىسىندا «ۇيىمداستىرۋشىلار كەڭسەسىن» تەلەفونيا مەن ينتەرنەتپەن قامتاماسىز ەتىپ، شەتەلدىك قاتىسۋشىلار ءۇشىن VPN قولجەتىمدىلىگىن تەحنيكالىق تۇرعىدان جاعداي جاساپ، كورمە قوناقتارىنا بۇكىل كورمە وتەتىن كەزەڭ بارىسىندا ينتەرنەت جەلىسىن ۇسىناتىن بولدى.