اقش پرەزيدەنتتىگىنە ۇمىتكەر دونالد ترامپتىڭ Truth Social الەۋمەتتىك جەلىسىنىڭ قۇنى X (بۇرىنعى Twitter) قوسىمشاسىنان  باسىم ءتۇستى، دەپ حابارلايدى Dalanews.kz.

ترامپ بۇل جەلىنى ءۇش جىل بۇرىن Twitter مەن Facebook ونى بۇعاتتاعاننان كەيىن كەك الۋ ماقساتىندا ىسكە قوسقان بولاتىن.

Truth Social اكسيالارى قىركۇيەك ايىنىڭ سوڭىنان بەرى ءتورت ەسە ءوستى، ناتيجەسىندە كومپانيانىڭ جالپى باعاسى 10 ميلليارد دوللارعا جەتتى. سوڭعى توقساندا دونالد ترامپتىڭ الەۋمەتتىك جەلىسى 16 ميلليون دوللار شىعىنعا ۇشىراعانىمەن، ءقازىر اكسيالاردىڭ ءوسۋى جەلىنىڭ تابىستىلىعىنا ەمەس، ترامپتىڭ اقش پرەزيدەنتتىگىنە قايتا سايلانۋ مۇمكىندىگى جوعارى بولۋىنا بايلانىستى بولىپ وتىر.

يلون ماسكقا تيەسىلى X الەۋمەتتىك جەلىسى (بۇرىنعى Twitter) قازىرگى تاڭدا 9،4 ميلليارد دوللارعا باعالانادى. ماسك بۇل جەلىنى 2022 جىلدىڭ قازان ايىندا باسقارۋدى قولعا العان كەزدە، ونىڭ قۇنى 44 ميلليارد دوللار بولعان ەدى.

ترامپ Truth Social جەلىسىنىڭ شامامەن 57%-ىنا يەلىك ەتەدى، ءبىراق ول كومپانيانىڭ باسقارۋ ىسىنە قاتىسپايدى. Truth Social جەلىسىن ترامپ 2021 جىلدىڭ 6 قاڭتارىندا كاپيتولييدەگى تارتىپسىزدىكتەردەن كەيىن Twitter مەن Facebook جەلىلەرىندە بۇعاتتالعان سوڭ اشقان ەدى.