قاسىم-جومارت توقايەۆ "ورتالىق ازيا – ەۋروپا وداعى" سامميتىنە قاتىستى، – دەپ حابارلايدى Dalanews.kz.
سامميت بارىسىندا قاسىم-جومارت توقايەۆ ۋكرايناعا قاتىستى كەلىسسوز پروسەسىنە قولداۋ ءبىلدىردى.
"قازاقستان كەز كەلگەن قاقتىعىستىڭ بەيبىت جولمەن شەشىلۋىن جاقتايدى. سوندىقتان ۋكرايناعا قاتىستى كەلىسسوزدەردىڭ باستالۋىن قۇپتايمىز. ماسەلەنىڭ كۇردەلى ەكەنىن تۇسىنەمىز. دەگەنمەن شيەلەنىس وڭ شەشىمىن تابادى دەپ ۇمىتتەنەمىز"، – دەدى پرەزيدەنت.
مەملەكەت باسشىسى بۇۇ باس اسسامبلەياسى الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ايماقتىق ورتالىقتى قۇرۋ تۋرالى قاراردى ءبىراۋىزدان قابىلداعانىن ايتىپ، جيىن قاتىسۋشىلارىنا قازاقستاننىڭ باستاماسىن قولداعانىنا ريزاشىلىق ءبىلدىردى.
پرەزيدەنتتىڭ پىكىرىنشە، ورتالىق ۇيىمنىڭ 2030 جىلعا دەيىنگى كۇن ءتارتىبىن ىلگەرىلەتۋگە، وڭىردەگى وزەكتى الەۋمەتتىك، ەكونوميكالىق جانە ەكولوگيالىق ماسەلەلەردى شەشۋگە ەلەۋلى ۇلەس قوسادى.
سامميتتە وزبەكستان پرەزيدەنتى شاۆكات ميرزيويەۆ، ەۋروپالىق كەڭەس پرەزيدەنتى انتونيۋ كوشتا، ەۋروپالىق كوميسسيا پرەزيدەنتى ۋرسۋلا فون دەر ليايەن، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو ءسوز سويلەدى.
