پرەزيدەنت قاسىم-جومارت توقايەۆ ادامنىڭ ءجۇزىن جاسىراتىن كيىمدەرگە قاتىستى ماسەلەنى رەتتەيتىن زاڭعا قول قويدى. مۇنداي كيىمدەردى كيۋگە ەندى رەسمي تۇردە تىيىم سالىنادى، دەپ حابارلايدى Dalanews.kz.

تىيىم سالۋ نورماسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن، قۇقىق قورعاۋ جانە ارنايى مەملەكەتتىك ورگاندار، ازاماتتىق قورعاۋ ورگاندارى مەن اسكەري قىزمەتشىلەردىڭ تۇرعىن ۇيمەن قامتاماسىز ەتىلۋى مەن الەۋمەتتىك قورعالۋىن جەتىلدىرۋ، سونداي-اق ىشكى ىستەر ورگاندارى قىزمەتىندەگى ارتىق زاڭنامالىق رەتتەۋدى الىپ تاستاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا ەنگىزىلدى.

زاڭ ماتىنىندە بىلاي دەلىنگەن:

"قازاقستان رەسپۋبليكاسىنىڭ زاڭدارىندا، قىزمەتتىك (لاۋازىمدىق، ەڭبەك) مىندەتتەردە، مەديسينالىق ماقساتتا، ازاماتتىق قورعاۋ كەزىندە، اۋا رايىنىڭ ەرەكشەلىكتەرىنە بايلانىستى، سونداي-اق سپورتتىق، سپورتتىق-بۇقارالىق جانە مادەني-بۇقارالىق ءىس-شارالارعا تىكەلەي قاتىساتىن تۇلعالاردان باسقا جاعدايلاردى قوسپاعاندا، قوعامدىق ورىنداردا ادامنىڭ بەت-جۇزىن تانۋعا كەدەرگى كەلتىرەتىن كيىم-كەشەك كيۋگە تىيىم سالىنادى".

ەسكە سالايىق، ماۋسىم ايىنىڭ باسىندا سەنات قوعامدىق ورىنداردا ادامنىڭ ءتۇر-سيپاتىن تانۋعا كەدەرگى كەلتىرەتىن كيىمدى كيۋگە تىيىم سالۋدى قاراستىراتىن تۇزەتۋدى ۇسىنعان ەدى.