پرەزيدەنت قاسىم-جومارت توقايەۆ ۇلتتىق دومبىرا كۇنىنە وراي الەۋمەتتىك جەلىدەگى ح پاراقشاسىندا قۇتتىقتاۋ جاريالادى، دەپ حابارلايدى Dalanews.kz.
"ۇلتتىق دومبىرا كۇنى قۇتتى بولسىن! بۇل مەرەكەنىڭ قازاق رۋحانياتى ءۇشىن ءمان-ماڭىزى زور. قاستەرلى اسپاپ دالا وركەنيەتىنىڭ اجىراماس بولىگىنە اينالدى. ءتول مادەنيەتىمىزدىڭ قۇندى قازىناسىن ساقتاۋ – بارشامىزدىڭ پارىزىمىز. دومبىرا توردەن تۇسپەسىن!"، – دەپ جازدى مەملەكەت باسشىسى.
ۇلتتىق دومبىرا كۇنى العاش رەت قازاقستاندا 2018 جىلى شىلدەدە تويلاندى. ءتيىستى جارلىققا ەلدىڭ تۇڭعىش پرەزيدەنتى نۇرسۇلتان نازاربايەۆ قول قويعان بولاتىن. سودان بەرى شىلدەنىڭ العاشقى جەكسەنبىسىندە مەيرام قۇرمەتىنە كونسەرتتەر مەن مەرەكەلىك شارالار وتەدى.
ەسكە سالايىق، 7 شىلدەدە ەكسپو اۋماعىندا ۇلتتىق دومبىرا كۇنىنە ارنالعان "زاماناۋي دومبىرا" مەرەكەلىك شوۋ-كونسەرتى وتەدى، دەپ حابارلايدى استانا اكىمدىگىنىڭ رەسمي سايتى.
كونسەرتتىك باعدارلامانىڭ تۇجىرىمداماسى – زاماناۋي بالەتپەن ۇشتاستىرا وتىرىپ، قازاق ەتنيكالىق دومبىرا اسپابىنىڭ الەۋەتىن زەرتتەۋگە جانە كورسەتۋگە باعىتتالعان مۋلتيمەديالىق ينتەراكتيۆتى تەحنولوگيالاردى پايدالانا وتىرىپ، مۋزىكالىق پەرفومانس دايىنداۋ.
ءىس-شارانى ۇيىمداستىرۋشىلار اتاپ وتكەندەي، مۋزىكانتتاردىڭ، سۋرەتشىلەردىڭ، بالەت ارتىستەرىنىڭ جانە گرافيكالىق مامانداردىڭ ىنتىماقتاستىعى ارقىلى دومبىرا باستى ءرول اتقاراتىن يننوۆاسيالىق دىبىستىق جانە كورنەكى شىعارما جاسالادى.
شوۋ تانىمال قازاقستاندىق ورىنداۋشىلار، سونداي-اق ەلوردا تۇرعىندارى مەن قوناقتارى اراسىندا ۇلتتىق اسپاپتى كەڭىنەن دارىپتەۋگە باعىتتالعان.
مەرەكەلىك كونسەرتتىڭ جۇرگىزۋشىلەرى: مارات ورالعازين مەن ەركەبۇلان مىرزابەك.
كەش قوناقتارى: Kalifarniya، اقتوتى بولشوۆا، "قورقىت" ەتنو-فولكلورلىق ءانسامبلى، "سەرپەر" ۆيرتۋوزدار دومبىراشىلار ءانسامبلى، "SAZ" ەتنو توبى، "Steppe Sons"، "Assyl"، "T&Y"، "ارت-دومبىرا"، "Aldaspan"، Dj گودۋنوۆ.
ءىس-شارا ەكسپو اۋماعىندا 7 شىلدەدە ساعات 18:00-دە وتەدى.
الماتىدا 7 شىلدە كۇنى ساعات 20:00-دە رەسپۋبليكا سارايىنىڭ الدىنداعى اباي الاڭىندا "اڭىز دومبىرا" كونسەرتى وتەدى.
ساحنادا روزا رىمبايەۆا، ماقپال ءجۇنىسوۆا، سەكەن تۇرىسبەك، ايگۇل قوسانوۆا، اسىلبەك ەڭسەپوۆ، شولپان دارجانوۆا، ءابدىلحاميت رايىمبەرگەنوۆ، نۇركەن ءاشىروۆ، ارداق بالاجانوۆا، نۇرجان جانپەيىسوۆ، "قوڭىر" توبى، "سازگەن" فولكلورلىق-ەتنوگرافيالىق ءانسامبلى، "سالتانات" بي ءانسامبلى جانە ت.ب. ونەر كورسەتەدى.
تانىمال كۇيشىلەر كەنەن ازىربايەۆ، تولەگەن مومبەكوۆ، اسەت بەيسەۋوۆ، مەيرامبەك جانبولاتوۆ جانە ت.ب. حالىق اندەرى مەن شىعارمالارىن ورىندايدى.
بۇعان قوسا، شاھار تۇرعىندارى مەن قوناقتارى مەرەكەگە وراي ۇيىمداستىرىلعان مادەني ءىس-شارالاردى تاماشالاي الادى.
