– مەنەن ەل ىشىندە دە، شەتەلدە دە قازىرگى مەملەكەت باسشىسى ءوزىنىڭ وكىلەتتىك مەرزىمىن رەفەرەندۋم ارقىلى ۇزارتۋعا، بىلايشا ايتقاندا، پرەزيدەنتتىك مەرزىمىن جاڭادان باستاۋعا نيەتتى مە دەپ سۇراپ جاتادى. مەنىڭ جاۋابىم: مۇنداي نيەت جوق جانە بولمايدى.
ۇسىنىلعان ساياسي جاڭعىرتۋ باعدارلاماسى ءوزىنىڭ مازمۇنى بويىنشا وتە اۋقىمدى. ءبىراق باستى نازار ادام قۇقىقتارى مەن بوستاندىعىن قورعاۋ جۇيەسىن نىعايتۋعا، ازاماتتاردىڭ مەملەكەتتىك باسقارۋعا قاتىسۋىن كەڭەيتۋگە، مەملەكەتتىك ينستيتۋتتاردىڭ اشىقتىعى مەن تيىمدىلىگىن ارتتىرۋعا باعىتتالعان، – دەدى توقايەۆ.
سونداي-اق، پرەزيدەت بۇل شارا ەلىمىزدەگى دەموكراتيالىق داستۇرلەردى نىعايتۋ جولىنداعى ماڭىزدى قادام ەكەنىن ايتتى.
– قازاقستاندا كونستيتۋسياعا وزگەرىستەر مەن تولىقتىرۋلار ەنگىزۋ بويىنشا جالپىحالىقتىق رەفەرەندۋم العاش رەت وتەدى. بۇل شارا ەلىمىزدەگى دەموكراتيالىق داستۇرلەردى نىعايتۋ جولىنداعى ماڭىزدى قادام بولماق. ەلىمىزدىڭ ازاماتتارى جالپى كونستيتۋسيالىق رەفورمالاردىڭ ماڭىزىن تۇسىنەدى.
قوعامىمىزدا رەفەرەندۋمعا ۇلكەن قىزىعۋشىلىق بار. شەتەلدە دە. بۇل قوعامدىق-ساياسي وزگەرىستەرگە دەگەن كەڭ الەۋمەتتىك سۇرانىستى جانە حالىقتىڭ الداعى وزگەرىستەرگە دەگەن سەنىمىن كورسەتەدى. بۇل – زاڭدىلىق. ويتكەنى رەفورمالار جەكە تۇلعالاردىڭ، سونىڭ ىشىندە پرەزيدەنتتىڭ ارتىقشىلىقتارىن ارتتىرۋ ەمەس، بۇكىل قوعام مۇددەسى ءۇشىن جۇرگىزىلىپ جاتىر، – دەدى مەملەكەت باسشىسى.
