بۇگىن اتىراۋ قالاسىندا ءوتىپ جاتقان ءۇشىنشى ۇلتتىق قۇرىلتايدا پرەزيدەنت قاسىم-جومارت توقايەۆ كورىسۋ كۇنىنىڭ مەرەكە ەمەس ەكەنىن العا تارتتى، دەپ حابارلايدى Dalanews.kz.
ول الدىمەن كوپشىلىكتى كورىسۋ كۇنىمەن قۇتتىقتاپ،قىستان امان-ەسەن شىققان تۋعان-تۋىس، اعايىن بىر-بىرىمەن قاۋىشىپ جاتقانىن اتاپ ءوتتى.
"ەل اراسىندا كورىسۋ كۇنى ەلىمىزدىڭ باتىس ايماعىنا ءتان مەرەكە دەگەن تۇسىنىك بار. ءبىراق بۇل قازاقتىڭ كونەدەن كەلە جاتقان ءداستۇرى ەكەنىن ۇمىتپاۋىمىز كەرەك. سوندىقتان ءبىز تۇتاس ەل بولىپ، ناۋرىز مەيرامىن وسى كۇننەن، ياعني كورىسۋ كۇنىنەن باستاپ تويلاعانىمىز جاراسىمدى بولارى ءسوزسىز"، - دەدى مەملەكەت باسشىسى.
توقايەۆ بيىل ۇلىستىڭ ۇلى كۇنى قاسيەتتى ورازا ايىنىڭ العاشقى كۇندەرىمەن تۇسپا-تۇس كەلگەنىن ەسكە سالدى. ۇلتتىق قۇرىلتاي دا ءاز ناۋرىز قارساڭىندا ءوتىپ جاتىر.
"ۇلىستىڭ ۇلى كۇنى تابيعات پەن تۇتاس تىرشىلىك جاڭارادى. ال قۇرىلتايدا قوعامدىق قۇندىلىقتاردى جاڭعىرتۋ ءۇشىن ماڭىزدى قادامدار جاسالادى. جاڭارۋ مەن جاڭعىرۋ جاقسىلىققا جول اشادى. سوندىقتان قۇرىلتاي مۇشەلەرىنىڭ جىلىنا ءبىر رەت القالى جيىندا باس قوسۋى يگى داستۇرگە اينالدى"، - دەدى پرەزيدەنت.
