كەڭەستە پرەمەر-مينيستر اسقار مامين پرەزيدەنتكە 5 شىلدەدەن باستاپ ەلىمىزدە قاتاڭ كارانتين شارالارى ەنگىزىلگەننەن كەيىن ىندەت جۇقتىرۋشىلاردىڭ سانى 29 پايىزعا تومەندەگەنىن باياندادى.
ءبىر كۇندە ىندەت جۇقتىراتىن ادامداردىڭ سانى 1500-1600 ارالىعىندا تۇراقتاعان.
ستاسيونارلارداعى ەمدەلۋشىلەردىڭ قاتارى 43 پايىزعا، ونىڭ ىشىندە، رەانيماسيالىق پالاتالارداعى ناۋقاستار سانى 27 پايىزعا ازايعان. ساۋىعىپ شىققانداردىڭ سانى 63 پايىزعا دەيىن وسكەن. جەدەل-جاردەم شاقىرۋ جاعدايى تومەندەگەن.
وسىلايشا دەنساۋلىق ساقتاۋ جۇيەسىنىڭ نەگىزگى جۇكتەمە كورسەتكىشىن تومەندەتۋگە قول جەتكىزىلگەن.
سونىمەن قاتار اسقار مامين قاسىم-جومارت توقايەۆقا دەرتكە شالدىعۋ جانە ادام ءولىمى، مەديسينالىق كومەكتىڭ قول جەتىمدىلىگى مەن ساپاسى، حالىقتان تەست سىناماسىن الۋ دەڭگەيى، ينتەنسيۆتى تەراپيا جانە رەانيماسيا پالاتالارىنىڭ قاجەتتى دارى-دارمەكتەرمەن، مەديسينالىق قۇرال-جابدىقتارمەن قامتاماسىز ەتىلۋى سەكىلدى نەگىزگى كورسەتكىشتەر بويىنشا وڭىرلەردەگى احۋالعا جۇرگىزىلگەن كۇندەلىكتى مونيتورينگ جايىندا مالىمەت بەردى.
دەنساۋلىق ساقتاۋ ءمينيسترى الەكسەي سوي مەملەكەت باسشىسىنا ينفراقۇرىلىم نىساندارىنىڭ ەپيدەميولوگيالىق احۋالعا جانە ەكونوميكاعا اسەرىن ەسكەرە وتىرىپ، كارانتين شارالارىن كەزەڭ-كەزەڭىمەن جەڭىلدەتۋ جولدارىن باياندادى.
مەملەكەت باسشىسى كوروناۆيرۋس ىندەتىنە شالدىعۋشىلاردىڭ جانە سونىڭ سالدارىنان بولاتىن ءولىم-جىتىمنىڭ كورسەتكىشىن ودان ءارى تومەندەتۋدىڭ اسا ماڭىزدى ەكەنىن اتاپ ءوتتى.
شىلدە ايىندا ەنگىزىلگەن شەكتەۋ شارالارىنىڭ وڭ اسەرىن ودان ءارى ارتتىرۋ ماقساتىندا، سونداي-اق، قازاقستانداعى جانە شەكارالاس مەملەكەتتەردەگى ەپيدەميولوگيالىق جاعدايدىڭ كۇردەلەنە ءتۇسۋ ىقتيمالدىعىن ەسكەرە وتىرىپ، قاسىم-جومارت توقايەۆ مەملەكەتتىك كوميسسياعا كارانتين شارالارىن كەزەڭ-كەزەڭىمەن جەڭىلدەتۋ ارقىلى ەكى اپتاعا ۇزارتۋدى تاپسىردى.
