پرەزيدەنت قاسىم-جومارت توقايەۆ شەنەۋنىكتەردىڭ جەمقورلىقپەن ۇستالۋىنا قاتىستى ويىن ايتتى، - دەپ حابارلايدى Dalanews.kz.
بۇل تۋرالى پرەزيدەنت "انا ءتىلى" گازەتىنە بەرگەن سۇحباتىندا ايتتى.
– قوعامدا سىبايلاس جەمقورلىق تۋرالى ءجيى ايتىلادى. وعان قارسى بەلسەندى كۇرەس جۇرگىزىلىپ جاتقانىن كورىپ وتىرمىز. جالپى، شەنەۋنىكتەردىڭ ۇستالعانى تۋرالى ءتۇرلى اقپاراتتار ەلىمىزدە جەمقورلىق ءورشىپ تۇرعانداي اسەر قالدىرادى. شىنىمەن دە سولاي ما؟
"سىبايلاس جەمقورلىقپەن جۇيەءلى تۇردە كۇرەسۋ – اسا قاجەتتى جۇمىس. بۇعان ەش كۇمان جوق. مەملەكەت جەمقورلىققا قاتىستى قۇقىق بۇزۋشىلىق فاكتىلەرىن انىقتاۋ عانا ەمەس، جەمقورلىقتىڭ الدىن الۋ ءۇشىن جۇمىس جۇرگىزىپ جاتىر.
قازاقستان جەمقورلىققا قارسى كۇرەس جولىندا ەڭ وزىق حالىقارالىق ستاندارتتاردى، سونىڭ ىشىندە ەكونوميكالىق ىنتىماقتاستىق جانە دامۋ ۇيىمى ەنگىزىپ جاتقان تالاپتاردى باسشىلىققا الادى. بۇل – وتە جوعارى تالاپ، ءبىز سوعان ساي بولۋىمىز كەرەك. بۇعان قوسا، مەن سىبايلاس جەمقورلىقپەن كۇرەسۋگە جاۋاپتى مەكەمەنىڭ باسشىلارىنا ناۋقانشىلدىققا سالىنباي، بايىپتى شەشىمدەر قابىلداۋ قاجەتتىگىن ۇنەمى ايتىپ وتىرامىن. ويتكەنى ءاربىر شەشىمنىڭ ارتىندا ادام تاعدىرى تۇر.
ال شەنەۋنىكتەردىڭ ۇستالعانى تۋرالى اقپاراتتىڭ ءجيى شىعۋى بيلىكتىڭ ابىرويىنا بەلگىلى ءبىر دەڭگەيدە نۇقسان كەلتىرگەنىمەن، مەملەكەتتىڭ اشىق جۇمىس ىستەيتىنىن كورسەتەدى. ءبىراق مۇنداي قادامسىز "زاڭ مەن ءتارتىپ" قاعيداتتارىنا نەگىزدەلگەن ادىلەتتى مەملەكەت قۇرۋ مۇمكىن ەمەس"، - دەدى پرەزيدەنت.
