مەملەكەت باسشىسى قاسىم-جومارت توقايەۆ ەنەرگەتيكا ءمينيسترى ەرلان اقكەنجەنوۆتى قابىلداپ، ەلدىڭ وتىن-ەنەرگەتيكا كەشەنىندەگى احۋال، نەگىزگى جوبالاردىڭ ىسكە اسىرىلۋى جانە سالانى دامىتۋ جوسپارلارى تۋرالى ەسەپتى تىڭدادى، دەپ حابارلايدى Dala news.
اقوردانىڭ مالىمەتىنشە، ەلدە مۇناي ءوندىرۋ تۇراقتى ءوسىم كورسەتىپ وتىر. سونىمەن قاتار مۇناي وڭدەۋ كولەمىن ارتتىرۋ جوسپارى تانىستىرىلدى. اتاپ ايتقاندا:
•شىمكەنت مۇناي وڭدەۋ زاۋىتىنىڭ قۋاتىن جىلىنا 6 ملن توننادان 12 ملن تونناعا دەيىن،
•اتىراۋ مۇناي وڭدەۋ زاۋىتىن 5،5 ملن توننادان 6،7 ملن تونناعا دەيىن،
•پاۆلودار مۇناي-حيميا زاۋىتىن 5،5 ملن توننادان 9 ملن تونناعا دەيىن ۇلعايتۋ كوزدەلىپ وتىر.
ەرلان اقكەنجەنوۆ 2029 جىلعا دەيىن جاڭا ەنەرگەتيكالىق قۋاتتاردى ىسكە قوسۋ جوسپارلارى تۋرالى دا باياندادى. بيىل الماتى قالاسىنداعى جەو-2 قۇرىلىسىن اياقتاۋ، سونداي-اق قىزىلوردا جانە تۇركىستان وبلىستارىندا بۋ-گاز قوندىرعىلارى نەگىزىندە ەلەكتر ستانسيالارىن پايدالانۋعا بەرۋ جوسپارلانعان.
مينيستر ۇلتتىق «كومىر گەنەراسياسىن دامىتۋ» جوباسىنىڭ ازىرلەنۋ بارىسى جونىندە دە اقپارات بەردى.
كەزدەسۋ قورىتىندىسىندا پرەزيدەنت وتىن-ەنەرگەتيكا سەكتورىن ودان ءارى دامىتۋعا قاتىستى ءبىرقاتار ناقتى تاپسىرما بەردى. مەملەكەت باسشىسى مۇناي-گاز، مۇناي-گاز حيمياسى جانە ەلەكتر ەنەرگەتيكاسى سالالارىنداعى جوسپارلانعان جوبالاردى ۋاقتىلى ءارى ساپالى جۇزەگە اسىرۋدىڭ ماڭىزىن اتاپ ءوتتى.
سونداي-اق قاسىم-جومارت توقايەۆ وندىرىستىك نىسانداردىڭ ءتيىمدى جۇمىسىن قامتاماسىز ەتۋ ءۇشىن سيفرلىق شەشىمدەر مەن جاساندى ينتەللەكت تەحنولوگيالارىن بەلسەندى ەنگىزۋ قاجەتتىگىن ەرەكشە اتاپ ءوتتى.
