سەنات ءتوراعاسى پولشا قازاقستاننىڭ ەۋروپا وداعىنداعى ماڭىزدى ارىپتەستەرىنىڭ ءبىرى ەكەنىن اتاپ ءوتتى.
پارلامەنت جوعارعى پالاتاسىنىڭ باسشىسى پارلامەنتارالىق ءۇنقاتىسۋعا قارقىن بەرۋ جانە ەكىجاقتى ءوزارا ءىس-قيمىلدى ورىستەتۋ جايىندا ايتتى. «پارلامەنت سەناتى ەكى ەل اراسىنداعى ەكونوميكالىق ىنتىماقتاستىقتى دامىتۋعا جاردەمدەسۋگە ءازىر»، - دەدى ق.توقايەۆ.
سەنات ءتوراعاسى مەملەكەت باسشىسى ن.ءا.نازاربايەۆتىڭ 2016 جىلى پولشاعا بارعان ساپارى ناتيجەلى بولعانىن، ساپار بارىسىندا 845 ميلليون دوللار بولاتىن كەلىسىمدەر مەن ينۆەستيسيالىق جوبالارعا قول قويىلعانىن اتاپ وتە كەلىپ، «ەكسپو-2017» حالىقارالىق كورمەسى اياسىنداعى پولشانىڭ ۇلتتىق كۇندەرىنە قاتىسقانى ءۇشىن پرەزيدەنت ا.دۋدا باستاعان پولشا باسشىلىعىنا العىس ءبىلدىردى.
ءدىنارالىق ىنتىماقتاستىقتى دامىتۋ ماسەلەلەرى دە تالقىلاندى. س.حازبييەۆيچ سەنات ءتوراعاسى، الەمدىك جانە ءداستۇرلى دىندەر ليدەرلەرىنىڭ سەزى حاتشىلىعىنىڭ باسشىسىنا پولشادا 10 جىلدان بەرى جۇمىس ىستەپ كەلە جاتقان كاتوليكتەر مەن مۇسىلماندار كەڭەسىمەن ءوزارا ءىس-قيمىل مۇمكىندىگىن قاراستىرۋدى ۇسىندى. ق.توقايەۆ الداعى جىلى قازاندا استانادا وتەتىن كەزەكتى سەزگە دايىندىق اياسىنداعى ىنتىماقتاستىققا شاقىرا وتىرىپ، «ءبىز ءۇنقاتىسۋدىڭ كەز-كەلگەن ءتۇرىن جاقتايمىز»، – دەدى.
[caption id="attachment_32411" align="alignleft" width="520"]
توقايەۆ فرانسيا ەلشىسىن قابىلدادى[/caption]
سول كۇنى ق.توقايەۆ ءىلتيپات ءبىلدىرىپ كەلگەن فرانسۋز رەسپۋبليكاسىنىڭ قازاقستانداعى ەلشىسى فيليپپ مارتينەنى دە قابىلدادى جانە وعان ىزگىلىكتى ىستە تابىستى بولۋىنا تىلەكتەستىگىن ءبىلدىردى. ول بيىلعى قازان ايىندا وسى لاۋازىمعا تاعايىندالعان بولاتىن. سەنات ءتوراعاسىنىڭ ايتۋىنشا، قازاقستان ءىرى جانە ماڭىزدى حالىقارالىق فورۋمدار وتەتىن ورىن رەتىندە ديپلوماتتارعا زور ىقىلاس تانىتىپ وتىر.
ەكىجاقتى قاتىناستاردىڭ جوعارى دەڭگەيىن اتاپ وتكەن ق.توقايەۆ فرانسۋز پارلامەنتشىلەرىن استاناعا ساپارلاپ كەلۋگە شاقىردى: «بايلانىستار كوپ ءارى ءجيى بولعان سايىن ءبىزدىڭ ەلدەرىمىز اراسىنداعى ىنتىماقتاستىق تا ناتيجەلى بولا تۇسەدى». ق.توقايەۆ بۇۇ رەسمي تىلدەرىنىڭ ءبىرى رەتىندەگى ماڭىزىن اتاپ وتە كەلىپ، قازاقستاندا فرانسۋز ءتىلىنىڭ كەڭىنەن قانات جايۋىنا جاردەمدەسۋ تۋرالى نيەتىنە قولداۋ ءبىلدىردى. ونىڭ ايتۋىنشا، دوستىق پەن ىنتىماقتاستىقتى نىعايتۋ فرانسيانىڭ مادەني قۇندىلىقتارىن ىلگەرىلەتۋگە، گۋمانيتارلىق بايلانىستاردى تەرەڭدەتۋگە ىقپال ەتەر ەدى.
فرانسيا ەلشىسى قازاقستان باسشىلىعىنىڭ وسى كوزقاراسى ءۇشىن العىس ايتتى جانە ءوز ەلىندە قازاق ستۋدەنتتەرىنىڭ ۇكىمەت پەن جەكە سەكتوردان بولىنەتىن گرانتتار مەن ستيپەندياعا وقۋ مۇمكىندىگىن الاتىنىن اتاپ ءوتتى.
ف.مارتينە ەكى ەل اراسىنداعى ستراتەگيالىق ارىپتەستىكتى نىعايتۋعا جاردەمدەسەتىن فرانسيا مەن ورتالىق ازيا اراسىندا جاڭا سيپاتتاعى ىنتىماقتاستىق ازىرلەنىپ جاتقانى تۋرالى سەنات ءتوراعاسىن حاباردار ەتتى.
