اقتوبە وبلىسىندا تىكۇشاق اپاتىنان قازا تاپقان وفيسەر كىم ەكەنى بەلگىلى بولدى، - دەپ حابارلايدى Dalanews.kz.
قورعانىس مينيسترلىگىنىڭ مالىمەتىنشە، وقۋ-جاتتىعۋ ۇشۋى كەزىندە بولعان اۆياسيالىق اپات سالدارىنان اۋە قورعانىسى كۇشتەرى اسكەري ينستيتۋتى اۆياسيالىق ەسكادريلياسىنىڭ وفيسەر-نۇسقاۋشىسى، مايور باتىر قايرات ۇلى ورازىمبەتوۆ قايعىلى جاعدايدا قازا تاپقان. ول 1988 جىلى دۇنيەگە كەلگەن.
وفيسەر اۋە قورعانىسى كۇشتەرى اسكەري ينستيتۋتىن 2009 جىلى "ۇشاقتار، تىكۇشاقتار جانە اۆياسيالىق قوزعالتقىشتار" ماماندىعى بويىنشا بىتىرگەن.
قىزمەت بارىسىندا اۋە قورعانىسى كۇشتەرىندە ءتۇرلى لاۋازىمداردان وتكەن. مي-8 تىكۇشاعىن پايدالانۋدا ۇلكەن تاجىريبەسى بار، جالپى ۇشۋ ۋاقىتى 500 ساعاتتان اسادى.
"قىزمەت بارىسىندا جوعارى كاسىبيلىك پەن ادالدىق تانىتقان. بيىل كوكتەمدە بولعان سۋ تاسقىنىنا قارسى ءىس-شارالارعا قاتىسقان. مەرەيتويلىق جانە ەڭبەك سىڭىرگەن جىلدارى ءۇشىن مەدالدارىمەن ماراپاتتالعان"، - دەپ جازىلعان حابارلامادا.
مارقۇم وفيسەر ۇيلەنگەن، ارتىندا ەكى بالاسى قالدى.
ۆەدومستۆو وكىلدەرى زارداپ شەككەندەر تۋرالى دا اقپاراتتى جاريالادى.
"اپات جاعدايىندا قونۋ كەزىندە زارداپ شەككەن اسكەري ينستيتۋت اۆياسيالىق ەسكادريلياسىنىڭ كومانديرى مايور بيبارىس يبرايەۆ پەن وقۋ-جاتتىعۋ اۆياسيالىق ورتالىعىنىڭ اعا ۇشقىش-نۇسقاۋشىسى اعا لەيتەنانت رۇستەم نىعمەتوۆ ءقازىر وبلىستىق اۋرۋحانادا جاتىر. جاعدايلارى تۇراقتى اۋىر. ولارعا بارلىق قاجەت مەديسينالىق كومەك كورسەتىلىپ جاتىر"، - دەپ جازىلعان حابارلامادا.
قازا تاپقان وفيسەر مەن زارداپ شەككەندەردىڭ تۋىستارىنا، جاقىندارىنا جان-جاقتى قولداۋ كورسەتىلىپ جاتقانى ايتىلدى.
