Aqtóbe oblysynda tikushaq apatynan qaza tapqan ofıser kim ekeni belgili boldy, - dep habarlaıdy Dalanews.kz.

Qorǵanys mınıstrliginiń málimetinshe, oqý-jattyǵý ushýy kezinde bolǵan avıasıalyq apat saldarynan Áýe qorǵanysy kúshteri áskerı ınstıtýty avıasıalyq eskadrılıasynyń ofıser-nusqaýshysy, maıor Batyr Qaıratuly Orazymbetov qaıǵyly jaǵdaıda qaza tapqan. Ol 1988 jyly dúnıege kelgen.

Ofıser Áýe qorǵanysy kúshteri áskerı ınstıtýtyn 2009 jyly "ushaqtar, tikushaqtar jáne avıasıalyq qozǵaltqyshtar" mamandyǵy boıynsha bitirgen.

Qyzmet barysynda Áýe qorǵanysy kúshterinde túrli laýazymdardan ótken. Mı-8 tikushaǵyn paıdalanýda úlken tájirıbesi bar, jalpy ushý ýaqyty 500 saǵattan asady.

"Qyzmet barysynda joǵary kásibılik pen adaldyq tanytqan. Bıyl kóktemde bolǵan sý tasqynyna qarsy is-sharalarǵa qatysqan. Mereıtoılyq jáne eńbek sińirgen jyldary úshin medaldarymen marapattalǵan", - dep jazylǵan habarlamada.

Marqum ofıser úılengen, artynda eki balasy qaldy.

Vedomstvo ókilderi zardap shekkender týraly da aqparatty jarıalady.

"Apat jaǵdaıynda qoný kezinde zardap shekken áskerı ınstıtýt avıasıalyq eskadrılıasynyń komandıri maıor Bıbarys Ibraev pen oqý-jattyǵý avıasıalyq ortalyǵynyń aǵa ushqysh-nusqaýshysy aǵa leıtenant Rústem Nyǵmetov qazir oblystyq aýrýhanada jatyr. Jaǵdaılary turaqty aýyr. Olarǵa barlyq qajet medısınalyq kómek kórsetilip jatyr", - dep jazylǵan habarlamada.

Qaza tapqan ofıser men zardap shekkenderdiń týystaryna, jaqyndaryna jan-jaqty qoldaý kórsetilip jatqany aıtyldy.