بۇگىنگى تاڭدا TikTok الەۋمەتتىك جەلىسى الەمنىڭ تۇكپىر-تۇكپىرىندە ۇلكەن تانىمالدىققا يە. ءبىزدىڭ ەلدە دە بۇل جەلىنىڭ قولدانۋشىلار سانى ارتپاسا، كەمىپ جاتقان جوق.

كورشى ەلگە تيەسىلى بۇل پلاتفورمانى كەي كرەاتيۆتى جاندار جاسوسپىرىمدەردى بىلىمگە، ەل تاريحىنا قىزىقتىرۋعا پايدالانىپ تا ءجۇر. ءبىراق ونداي كونتەنت سانى وزگە كونتەنتپەن سالىستىرعاندا شولگە تاستاعان جۇزىكتەي تىم از. TikTok-تاعى كونتەنتتىڭ باسىم بولىگى قانداي سارىندا ەكەنىن مەن ايتپاسام دا، وزدەرىڭىز بايقاپ جۇرسىزدەر. سول كوڭىل كونشىتپەيتىن كونتەنتتىڭ كوپتىگىنەن پاۆلوۆتىڭ: «سچاستە - گدە-تو مەجدۋ سۆوبودوي ي ديسيپلينوي» دەگەنى ويعا كەلەدى.

ءيا، دۇرىس ءتۇسىنىپ وتىرسىزدار، مەن بۇل پلاتفورمانى «ءىشىنارا» شەكتەۋ جايىنا ءوز بەس تيىنىمدى قىستىرماقپىن. جاستارىمىزدىڭ نازارىن جاۋلاعان بۇل پلاتفورماعا بەلگىلى ءبىر شەكتەۋلەر قويۋدى قولداۋىمنىڭ سەبەبى ءارتۇرلى. تارقاتا ايتساق:

بىرىنشىدەن، بالالاردىڭ پسيحيكالىق دەنساۋلىعى الاڭداۋشىلىق تۋعىزادى. TikTok-تاعى كەيبىر كونتەنت بالالاردىڭ مىنەز-قۇلقىنا تەرىس اسەر ەتىپ، ولاردى جالعان يدەالدارعا جەتەلەپ، تاۋەلدىلىككە اكەلۋى مۇمكىن. قىرعىزستان وسى ماقساتتا پلاتفورماعا تىيىم سالىپ، بالالاردىڭ پسيحيكاسىن قورعاۋعا باعىتتالعان قادام جاسادى. ءبۇلدىرشىن تاربيەلەپ وتىرعان اكە رەتىندە بۇل جاعى مەنى قاتتى الاڭداتادى.

ەكىنشىدەن، كيبەرقاۋىپسىزدىك – قازىرگى زامانعى سيفرلىق الەمنىڭ باستى ماسەلەلەرىنىڭ ءبىرى. اقش، فرانسيا، باسقا دا ەلدەر TikTok-تىڭ پايدالانۋشىلاردىڭ دەرەكتەرىن جيناۋ ادىستەرىنە كۇماندانىپ، جەلىگە شەكتەۋلەر ەنگىزدى. قازاقستاندا دا كيبەرقاۋىپسىزدىككە نازار اۋدارۋ وتە ماڭىزدى، ويتكەنى جەكە جانە مەملەكەتتىك مالىمەتتەردىڭ قورعالۋى ۇلتتىق قاۋىپسىزدىكپەن تىكەلەي بايلانىستى.

مالىمەتتەردىڭ قۇپيالىلىعى دا ۇلكەن الاڭداۋشىلىق تۋعىزادى. كانادا TikTok-تى دەرەكتەردىڭ قاۋىپسىزدىگىنە بايلانىستى شەكتەۋ شارالارىن ەنگىزگەن. بۇل پلاتفورمانىڭ پايدالانۋشىلار تۋرالى مالىمەتتەردى جيناۋ جانە ولاردى ساقتاۋ تاسىلدەرى كۇماندى بولۋى مۇمكىن، ال بۇل قازاقستان ءۇشىن دە وزەكتى ماسەلە.

ۇشىنشىدەن، قوعامدىق تۇراقتىلىقتى ساقتاۋ ماقساتىندا دا شەكتەۋلەر قاجەت بولۋى مۇمكىن. TikTok-تا جالعان اقپارات پەن ارانداتۋشى مازمۇنداردىڭ تارالۋى ەلدەگى الەۋمەتتىك تۇراقتىلىققا تەرىس اسەر ەتۋى ىقتيمال. جالعان اقپاراتتىڭ كەڭىنەن تارالۋى قوعامدا دۇربەلەڭ تۋدىرىپ، قوعامدىق پىكىردى بۇرمالاۋى مۇمكىن.

قورىتىندىلاي كەلە، TikTok جەلىسىنە ءىشىنارا شەكتەۋ ەنگىزۋ قازاقستان ءۇشىن ماڭىزدى قادام بولماق دەگەن ويدامىن. بالالاردىڭ پسيحيكالىق ساۋلىعىن قورعاۋ، دەرەكتەردىڭ قاۋىپسىزدىگىن قامتاماسىز ەتۋ جانە قوعامداعى تۇراقتىلىقتى ساقتاۋ ماقساتىندا بۇل شارالار ورىندى بولادى دەپ ەسەپتەيمىن.

گەنناديي شيپوۆسكيح، ق ر پارلامەنتى ءماجىلىسىنىڭ دەپۋتاتى