Instagram-داعى ساتيرالىق Qaznews24 پابليگىنىڭ اۆتورى تەمىرلان ەڭسەبەكتىڭ قورعاۋشىسى الماتى قالالىق سوتىنا اپەللياسيالىق شاعىم ءتۇسىردى، دەپ حابارلايدى Dalanews.kz.
ادۆوكات جانار بالعابايەۆانىڭ ايتۋىنشا، شاعىم e-Otinish پورتالى ارقىلى بەرىلگەن. ونىڭ سوزىنشە، سوت جۇيەسىندە تەحنيكالىق اقاۋلار ورىن الىپ جاتقانىمەن، شاعىم زاڭدا بەلگىلەنگەن مەرزىمدە جولدانعان. ءقازىر تولىق اپەللياسيالىق نەگىزدەمە ازىرلەنىپ جاتىر.
"ءبىز قىسقاشا شاعىمدى جىبەرىپ ۇلگەردىك. نەگىزگى دالەلدەر مەن ۋاجدەردى كەيىنىرەك تولىقتىردىق. ازىرگە الماتى قالالىق سوتىنىڭ اپەللياسيالىق القاسىنىڭ قاراۋىنا جولداندى"، – دەيدى قورعاۋشى.
ادۆوكاتتىڭ ايتۋىنشا، ناۋرىزباي اۋداندىق سوتىنىڭ ۇكىمى زاڭدى كۇشىنە ەنگەن جوق. دەگەنمەن، مىنەز-قۇلىققا قاتىستى الدىن الا ەسكەرتۋ ەنگىزىلگەن. ەگەر تەمىرلان ءقازىر بەلسەندى پىكىر بىلدىرە باستاسا، بۇل سوت تالابىن بۇزۋ رەتىندە قاراستىرىلۋى مۇمكىن.
"ۇكىم ءالى كۇشىنە ەنبەگەنىمەن، سوت وعان كەيبىر شەكتەۋ سيپاتىنداعى مىندەتتەمەلەردى ساقتاۋعا مىندەتتەدى. ياعني، بۇل جاعدايدا وتە ساق بولۋ قاجەت. مۇنداي ارەكەتتەر، شىن مانىندە، ونى ءۇنسىز قالدىرۋعا باعىتتالعان"، – دەدى بالعابايەۆا.
ەسكە سالايىق، "الاۋىزدىق قوزدىردى" دەپ ايىپتالعان Qaznews24 ساتيرالىق پابليگىنىڭ اۆتورى تەمىرلان ەڭسەبەك 5 جىل باس بوستاندىعىن شەكتەۋ جازاسىنا كەسىلگەن ەدى.
الماتى قالاسىنىڭ ناۋرىزباي اۋداندىق سوتىندا الەۋمەتتىك جەلىلەردى پايدالانۋ ارقىلى ۇلتتىق ارازدىقتى قوزدىردى دەپ ايىپتالعان تەمىرلان ەڭسەبەككە قاتىستى قىلمىستىق ءىس قارالعان بولاتىن.
"تەمىرلان ەڭسەبەك Instagram پاراقشاسىنىڭ 34 مىڭنان استام وقىرمانى بار پاراقشاسىنىڭ اكىمشىسى بولا وتىرىپ، باسقا ۇلت وكىلدەرىنىڭ ۇلتتىق ابىرويى مەن قادىر-قاسيەتىن كوپشىلىك الدىندا قورلاۋعا باعىتتالعان، دورەكى، بالاعات سوزدەرمەن جازىلعان ءماتىنى بار مۋزىكالىق كومپوزيسيامەن بىرگە پوست جاريالاعان"، - دەلىنگەن ۇكىمدە.
سوتتا مۇنداي ارەكەتتەر قازاقستان رەسپۋبليكاسىنىڭ نەگىزگى قاعيداتتارىنىڭ ءبىرى بولىپ تابىلاتىن ۇلتارالىق كەلىسىم مەن حالىق بىرلىگىن بۇزۋعا باعىتتالعانىن ايتتى.
"سوتتالۋشىنىڭ كىناسى ءىس ماتەريالدارىمەن، سونىڭ ىشىندە سوت-پسيحولوگيالىق جانە فيلولوگيالىق ساراپتاما قورىتىندىسىمەن، جاۋاپ الۋ حاتتامالارىمەن جانە زاتتاي دالەلدەمەلەرمەن دالەلدەندى"، - دەدى سوتتا.
ءىس قاراۋ بارىسىندا تەمىرلان ەڭسەبەك ءوز كىناسىن مويىنداماعان.
سوت وتىرىسىنىڭ قورىتىندىسى بويىنشا، قىلمىستىق ءىس ماتەريالدارىن زەرتتەپ، تاراپتاردىڭ سوت جارىسسوزدەرىندە ايتقان ۇستانىمدارىن ەسكەرە وتىرىپ، سوت سوتتالۋشىنى اتالعان ارەكەتتى جاساعانى ءۇشىن كىنالى دەپ تانىدى. سوت شەشىمى قىلمىستىق كودەكستىڭ 174-بابىنىڭ 1-بولىگى بويىنشا جازا 2 مىڭنان 7 مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋدى نە 2 جىلدان 7 جىلعا دەيىنگى مەرزىمگە باس بوستاندىعىن شەكتەۋدى نە سول مەرزىمگە باس بوستاندىعىنان ايىرۋدى كوزدەيدى.
سونداي-اق سوت تەمىرلان ەڭسەبەككە قوعامدىق قىزمەتپەن اينالىسۋعا، ونىڭ ىشىندە جۋرناليست رەتىندە جۇمىس ىستەۋگە تىيىم سالۋ تۋرالى ۇكىم شىعاردى.
"سوت شەشىم شىعارعان كەزدە، سوتتالۋشىنىڭ بۇرىن سوتتالماعانى ەسكەرىلدى، الايدا ول ءوز قۇقىققا قايشى ارەكەتى ءۇشىن وكىنىش بىلدىرمەگەن. وسىلايشا، سوت سوتتالۋشىنى بەلگىلى ءبىر قىزمەتپەن اينالىسۋ قۇقىعىنان ايىرۋ تۇرىندەگى قوسىمشا جازامەن باس بوستاندىعىنان ايىرۋمەن بايلانىستى ەمەس 5 جىل باس بوستاندىعىن شەكتەۋ جازاسىن تاعايىندادى"، - دەلىنگەن سوت ۇكىمىندە.
ەسكە سالايىق، QazNews24 ساتيرالىق پابليگىنىڭ اۆتورى تەمىرلان ەڭسەبەكتى پوليسيا 17 قاڭتاردا ۇيىنە ءتىنتۋ جۇرگىزگەننەن كەيىن ۇستاپ اكەتكەن. 18 قاڭتاردا ەڭسەبەك ەكى ايعا قاماۋعا الىندى. وعان "ۇلتارالىق الاۋىزدىق قوزدىردى" دەگەن ايىپ تاعىلىپ وتىر. پوليسيا قىلمىستىق ءىستىڭ سەبەبى – ۇلتارالىق ارازدىقتى قوزدىرۋ جانە ەتنوستاردىڭ ءبىرىنىڭ وكىلدەرىن قورلاۋ بەلگىلەرى بار ماتەريالدى جاريالاۋ بولعان.
