قازاقستاندا ينكليۋزيانى دامىتۋدىڭ ناقتى قادامدارىنىڭ ءبىرى رەتىندە تەمىرجول كولىگىنە قاتىستى ءبىرقاتار جاڭالىقتار بار. ەندى ءى جانە ءىى توپتاعى مۇگەدەكتىگى بار ازاماتتاردى ەرتىپ جۇرەتىن تۇلعالار جانە ەرەكشە قاجەتتىلىكتەرى بار بالالاردىڭ سەرىكتەرى تەمىرجول بيلەتتەرىن 50 پايىز جەڭىلدىكپەن الا الادى. بۇل جاڭالىقتار ق ر كولىك مينيسترلىگىنىڭ باستاماسىمەن جولاۋشىلاردى تاسىمالداۋ ەرەجەلەرىنە ەنگىزىلەتىن وزگەرىستەر جوباسىندا كورىنىس تاپقان.

بۇرىن مۇمكىندىگى شەكتەۋلى جولاۋشىلار مەن ولاردىڭ ەرىپ جۇرۋشىلەرى ساپارعا شىعار الدىندا مەديسينالىق مەكەمەلەردەن انىقتاما جيناپ، قۇجاتتارىن كورسەتۋگە ءماجبۇر بولاتىن. ەندى بۇل تالاپتىڭ جويىلۋى ازاماتتارعا ەداۋىر جەڭىلدىك اكەلەدى. ەرەجەلەردىڭ 44-تارماعىنان مەديسينالىق انىقتامالاردى ۇسىنۋ نورماسى الىنىپ تاستالىپ، جولاۋشى تۋرالى مالىمەتتەر اۆتوماتتى تۇردە مەملەكەتتىك دەرەكقور ارقىلى تەكسەرىلەدى.

كولىك مينيسترلىگىنىڭ حابارلاۋىنشا، بۇل وزگەرىستەردى ازىرلەۋگە تەمىرجول جانە سۋ كولىگى كوميتەتىنىڭ ماماندارى تىكەلەي قاتىسقان. ءقازىر جوبا بەكىتۋ كەزەڭىندە تۇر. قۇجاتتار ماقۇلدانعان جاعدايدا جاڭا ەرەجەلەر 2025 جىلدىڭ ەكىنشى جارتىسىنان باستاپ كۇشىنە ەنەدى دەپ جوسپارلانىپ وتىر.

«قازىرگى تاڭدا مۇمكىندىگى شەكتەۋلى ازاماتتار الەۋمەتتىك ماڭىزى بار باعىتتار بويىنشا عانا 50 پايىز جەڭىلدىكپەن جول جۇرۋگە قۇقىلى. الايدا بۇل جەڭىلدىك تەك ولاردىڭ وزدەرىنە ارنالعان ەدى. جاڭا باستاما بۇل شەڭبەردى كەڭەيتىپ، ولاردىڭ سەرىكتەرىن دە قامتيدى. بۇل قادام مۇمكىندىگى شەكتەۋلى ادامداردىڭ ءوز بەتىمەن قوزعالۋىن جەڭىلدەتىپ قانا قويماي، ولاردىڭ ەركىن، ءقاۋىپسىز جانە لايىقتى ساپار شەگۋىنە جاعداي جاسايدى»، - دەپ مالىمدەدى كولىك مينيسترلىگىنەن.

سونىمەن بىرگە، قازاقستاندا ارنايى جابدىقتالعان جولاۋشىلار ۆاگوندارىنىڭ پاركى دە جاڭارتىلىپ جاتىر. كولىك ينفراقۇرىلىمىن دامىتۋ باعدارلاماسى اياسىندا «زيكستو» وتاندىق زاۋىتىنان 157 جولاۋشىلار ۆاگونى ساتىپ الىنادى. ونىڭ ىشىندە 14 ۆاگون مۇمكىندىگى شەكتەۋلى جاندارعا بەيىمدەلگەن. ءقازىردىڭ وزىندە ءتورت جاڭا ۆاگون پايدالانۋعا بەرىلدى، ال جىل سوڭىنا دەيىن تاعى ون ۆاگون ىسكە قوسىلادى.

تاعى ءبىر اۋقىمدى جوسپار – 2025 پەن 2030 جىلدار ارالىعىندا «شتادلەر – قازاقستان» زاۋىتىنان ەلىمىزگە 557 جاڭا ۆاگون جەتكىزۋ. بۇل ۆاگونداردىڭ 35ء-ى ارنايى كۋپەلەرمەن جابدىقتالىپ، ەرەكشە قاجەتتىلىكتەرى بار جولاۋشىلاردىڭ سۇرانىسىنا تولىقتاي ساي بولادى.

جاڭارتۋلار تەك ۆاگوندارمەن شەكتەلمەيدى. تەمىرجول ۆوكزالدارى دا تولىق بەيىمدەلۋ ۇستىندە. جوبا اياسىندا بيىل ءبىرقاتار ۆوكزالداردا پاندۋستار ورناتىلادى، پەرروندارعا ارنايى كوتەرگىش قۇرىلعىلار قويىلادى جانە تاكتيلدى باعىتتاۋشى جولاقتار سالىنادى. بۇل جۇمىستاردىڭ بارلىعى — مۇمكىندىگى شەكتەۋلى ازاماتتاردىڭ ۆوكزال اۋماعىندا ەركىن قوزعالۋى ءۇشىن اتقارىلۋدا.

بۇل باستامالار – ەلىمىزدەگى ينكليۋزيا باعىتىنداعى جۇيەلى جۇمىستىڭ ءبىر كورىنىسى. مۇمكىندىگى شەكتەۋلى جاندار ءۇشىن تەك قۇقىقتىق ەمەس، ينفراقۇرىلىمدىق جانە لوگيستيكالىق قولجەتىمدىلىكتى دە قامتاماسىز ەتۋ – ناعىز وركەنيەتتى قوعامنىڭ بەلگىسى. قازاقستان بۇل باعىتتا ايقىن ىلگەرىلەۋ جاساپ كەلەدى.

مۇنداي جەڭىلدىكتەر مەن ينفراقۇرىلىمدىق شەشىمدەر ازاماتتاردىڭ قوعام ومىرىنە بەلسەندى ارالاسۋىنا، ءبىلىم الىپ، جۇمىس ىستەۋىنە، ساپار شەگىپ، مادەني شارالارعا قاتىسۋىنا مۇمكىندىك بەرەدى. ەڭ باستىسى — ولاردى تولىققاندى ازامات رەتىندە تانۋعا ىقپال ەتەدى.