بايقاۋدىڭ ماقساتى – قازاق حالقىنىڭ مول مۇراسى سانالاتىن ءداستۇرلى ءان ونەرىن كەيىنگى ۇرپاققا جەتكىزۋ، ساقتاۋ، ءوڭىردىڭ ونەرلى ورەندەرىن، جاس تەرمەشىلەردىڭ تالانتىن شىڭداۋ، شىعارماشىلىق كاسىبي دەڭگەيىن ءوسىرۋ، ونەرسۇيەر قاۋىمعا كەڭىنەن ناسيحاتتاۋ.
تەرمەشىلەر ونەرىن وبلىستىق «جەتىسۋ» گازەتى باس رەداكتورىنىڭ ورىنباسارى، قازىلار القاسىنىڭ ءتوراعاسى ءنۇسىپباي ءابدىراحىموۆ، قازاقستان رەسپۋبليكاسىنىڭ مادەنيەت قايراتكەرى، ءداستۇرلى ءانشى، قازىلار القاسىنىڭ مۇشەسى ابىلاي قارمىسوۆ جانە الماتى وبلىسىنىڭ تىلدەردى دامىتۋ جونىندەگى باسقارماسىنىڭ ءبولىم باسشىسى قاھارمان جاقسىلىق تارازىعا سالدى.
كەش شىمىلدىعىن اشقان وبلىستىق تىلدەردى دامىتۋ جونىندەگى باسقارما باسشىسىنىڭ مىندەتىن اتقارۋشى گۇلنار بىتىبەكوۆا دودا دارابوزدارىنا جىلى لەبىزىن ءبىلدىرىپ، ساتتىلىك تىلەدى.
بايقاۋ ەرەجەسى بويىنشا قاتىسۋشىلار ەل بىرلىگى، الاشوردانىڭ 100 جىلدىعى، قازاقستان حالقىن توپتاستىرۋداعى ءتىلدىڭ ماڭىزدى ءرولى تۋرالى كوركەم سوزدەن مارجان ءتىزىپ، جۇيرىك ويدان جىر توقىدى.
سايىس بولعان سوڭ جەڭۋ مەن جەڭىلىس قاتار جۇرەدى ەمەس پە؟ باس جۇلدەنى قاراسايلىق ناريمان ءابدىراحمانوۆ جەڭىپ السا، ءبىرىنشى ورىن ەڭبەكشىقازاق اۋدانىنان كەلگەن جۇلدىز ىسقاقوۆقا بۇيىردى. ال ەكىنشى جۇلدەلى ورىنعا الاكولدىك راۋان ەكسىلوۆ پەن جاركەنتتىك جاندوس مۇقاجان لايىق دەپ تابىلدى. جۇلدەلى ءۇشىنشى ورىن ءۇش ادامعا تيەسىلى بولدى. اتاپ ايتساق، زامانبەك بولاتبەك (كوكسۋ اۋدانى)، ساۋلە جۇماباي (قاپشاعاي قالاسى) جانە اقسۋلىق مامىربەك كادىرحان.
بايقاۋدىڭ ىنتالاندىرۋ سىيلىعىن سارقان اۋدانىنان قاتىسقان قۇشتار سەرىك، كەنشىلەر قالاسىنان كەلگەن تاماشا كادىربەك قىزى جانە لاۋرا قىنتايەۆا (تالعار اۋدانى) يەلەندى.
بارلىق جەڭىمپازعا باسقارمانىڭ اقشالاي سىيلىعى مەن ارنايى ديپلومى تابىس ەتىلدى.
