Tekti sózdiń tóresi – terme
Baiqaýdyń maqsaty – qazaq halqynyń mol murasy sanalatyn dástúrli án ónerin keiingi urpaqqa jetkizý, saqtaý, óńirdiń ónerli órenderin, jas termeshilerdiń talantyn shyńdaý, shyǵarmashylyq kásibi deńgeiin ósirý, ónersúier qaýymǵa keńinen nasihattaý.
Termeshiler ónerin oblystyq «Jetisý» gazeti bas redaktorynyń orynbasary, qazylar alqasynyń tóraǵasy Núsipbai Ábdirahymov, Qazaqstan Respýblikasynyń Mádeniet qairatkeri, dástúrli ánshi, qazylar alqasynyń múshesi Abylai Qarmysov jáne Almaty oblysynyń tilderdi damytý jónindegi basqarmasynyń bólim basshysy Qaharman Jaqsylyq tarazyǵa saldy.
Kesh shymyldyǵyn ashqan oblystyq tilderdi damytý jónindegi basqarma basshysynyń mindetin atqarýshy Gúlnar Bitibekova doda darabozdaryna jyly lebizin bildirip, sáttilik tiledi.
Baiqaý erejesi boiynsha qatysýshylar el birligi, Alashordanyń 100 jyldyǵy, Qazaqstan halqyn toptastyrýdaǵy tildiń mańyzdy róli týraly kórkem sózden marjan tizip, júirik oidan jyr toqydy.
Saiys bolǵan soń jeńý men jeńilis qatar júredi emes pe? Bas júldeni qarasailyq Nariman Ábdirahmanov jeńip alsa, birinshi oryn Eńbekshiqazaq aýdanynan kelgen Juldyz Ysqaqovqa buiyrdy. Al ekinshi júldeli orynǵa alakóldik Raýan Eksilov pen jarkenttik Jandos Muqajan laiyq dep tabyldy. Júldeli úshinshi oryn úsh adamǵa tiesili boldy. Atap aitsaq, Zamanbek Bolatbek (Kóksý aýdany), Sáýle Jumabai (Qapshaǵai qalasy) jáne aqsýlyq Mamyrbek Kádirhan.
Baiqaýdyń yntalandyrý syilyǵyn Sarqan aýdanynan qatysqan Qushtar Serik, kenshiler qalasynan kelgen Tamasha Kádirbekqyzy jáne Laýra Qyntaeva (Talǵar aýdany) ielendi.
Barlyq jeńimpazǵa basqarmanyń aqshalai syilyǵy men arnaiy diplomy tabys etildi.
