«تازا قازاقستان. استانا – تازالىق پەن ءتارتىپتىڭ ۇلگىسى» اتتى كەڭ كولەمدى ەكولوگيالىق اكسيا اياسىندا ەلوردادا 13 قىركۇيەكتەن 11 قازانعا دەيىن ءداستۇرلى «تازا قازاقستان: تازا استانا» ەكولوگيالىق ايلىعى وتەدى،- دەپ حابارلايدى Dalanews.kz.
ايلىق بارىسىندا قالا اۋماعىن قوقىستان تازارتۋ، ساياباقتار مەن گۇلزارلاردى، اۋلالار مەن ساۋدا ورىندارىن، قوعامدىق تاماقتانۋ نىساندارىن جانە وزگە دە ۇيىمدارعا ىرگەلەس اۋماقتاردى جيناۋ جۇمىسى جوسپارلانعان.
ەكوايلىق بارىسىندا ەلوردانىڭ التى اۋدانىندا اعاش وتىرعىزىلادى. اكىمدىك بارلىق قالا كاسىپورىندارىن، پيك (ميب)، شاعىن جانە ورتا بيزنەس وكىلدەرىن، ۆولونتەرلەردى جانە جاناشىر تۇرعىنداردى ەكواكسياعا قوسىلىپ، قالانى اباتتاندىرۋعا بەلسەنە قاتىسۋعا شاقىرادى.
ەسكە سالايىق، ەكواكسيانىڭ نەگىزگى ماقساتى – قالا كوشەلەرىنىڭ تازالىعىن ساقتاۋعا قوعام نازارىن اۋدارۋ جانە ەكولوگيالىق مادەنيەتتى قالىپتاستىرۋ. قالا كوشەلەرىن، اۋلالارىن اباتتاندىرۋعا كەز كەلگەن تۇرعىن مەن ۇيىم ءوز ۇلەسىن قوسا الادى.
