ونىڭ ايتۋىنشا بۇل اسىعىس ءارى ساۋاتسىز شەشىم. سونىڭ سالدارىنان قازاقستان التىن ۆاليۋتا قورىنىڭ ءبىر بولىگىنەن ايىرىلىپ تىنادى.
"تەڭگە باعامىن بەلگىلى ءبىر دالىزدە تەك ينتەرۆەنسيا جاساپ ماڭگى باقي ۇستاپ تۇرا المايمىز. مۇنى سوڭى كۇيرەۋگە اكەلەدى. ونىڭ ۇستىنە ەرتەڭ رەسەيدە رۋبل قۇلدىراسا، ءبىزدىڭ وندىرۋشىلەر تاعى بانكروتقا ۇشىرايدى، تەڭگە تىم قىمبات بولۋى سەبەپتى رەسەيلىك وندىرۋشىلەر ولاردى تىقسىرىپ شىعادى. ءبىز مۇنى 2015 جىلى باستان وتكەردىك"، – دەيدى تايجان.
ساياساتكەردىڭ پىكىرىنشە ەركىن اينالىمدا ينتەرۆەنسيا بولماۋى كەرەك.
"2015 جىلى ۇلتتىق بانكتى مۇنداي قادامعا بارۋعا كەيبىر "تاۋەلسىز" ساراپشىلاردىڭ اقىل-كەڭەسى يتەرمەلەدى. قىپ-قىزىل شىعىنعا باتتىق"، – دەيدى تايجان.
ايتا كەتەلىك 2015 جىلدىڭ 20 تامىزىندا تەڭگەنى ەركىن اينالىمعا جىبەرگەنگە دەيىن ۇلتتىق بانك تەڭگە باعامىن ۇستاپ تۇرۋ ءۇشىن سوعان دەيىنگى 1 جىل 8 ايدىڭ ىشىندە ۇلتتىق قوردان 28 ملرد اقش دوللارىن جۇمساپ جىبەرگەن.
ەكونوميست ماقسات حالىقتىڭ ايتۋىنشا سول ۋاقىتتاعى تەڭگە-دوللار باعامىمەن ەسەپتەيتىن بولساق بۇل 5 ترلن 180 ملرد تەڭگە.
ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ ۇلتتىق بانككە ۆاليۋتا ساياساتىن قايتا قاراپ، حالىقتىڭ باس بانككە دەگەن سەنىمىن قالپىنا كەلتىرۋ كەرەكتىگىن تاپسىرعان ەدى.
رەداكسيادان: ۆاليۋتالىق ينتەرۆەنسيا دەپ ۇلتتىق ۆاليۋتا باعامىنا اسەر ەتۋ ماقساتىندا ۇلتتىق بانكتىڭ شەتەل ۆاليۋتاسىن ساتۋ جانە ساتىپ الۋ جولىمەن ۆاليۋتالىق نارىقتاعى وپەراسيالارعا ارالاسۋىن ايتادى.
...
ۇلتتىق بانك بۇدان بولەك بازالىق مولشەرلەمەنى 9،5%-دان 12%-عا دەيىن ءوسىردى. بۇل - باس قارجى ينستيتۋتىنىڭ كوممەرسيالىق بانكتەرگە بەرەتىن كرەديتىنىڭ ستاۆكاسى.
"سىرتقى سەكتور تاراپىنان وسكەن تاۋەكەلدەر اياسىندا باعا تۇراقتىلىعىن قولداۋدى قامتاماسىز ەتۋ، سونداي-اق تەڭگەنىڭ ايىرباس باعامىن قورعاۋ قاجەت. سوندىقتان ۇلتتىق بانك ءوز مانداتى شەڭبەرىندە كەزەكتەن تىس وتىرىستا بيىلعى 10 ناۋرىزدان باستاپ بازالىق مولشەرلەمەنى جانە پايىزدىق ءدالىزدى +/- 1،5 پ. ت. جىلدىق 12%-عا دەيىن ارتتىرۋ تۋرالى شەشىم قابىلدادى"، — دەدى بۇل ورايدا ۇلتتىق بانك ءتوراعاسى ە. دوسايەۆ.
ونىڭ ايتۋىنشا بازالىق مولشەرلەمەنى ارتتىرۋ ماكروەكونوميكالىق جانە قارجىلىق تۇراقتىلىقتى ساقتاۋعا جاعداي جاسايدى جانە سىرتقى سەكتوردىڭ ىشكى باعالارعا جانە دوللارلاندىرۋعا تەرىس اسەرىنىڭ الدىن الادى.
- بانكتەر سولاي مەملەكەتتەن قارىز الىپ، وعان تاعى پروسەنت قوسىپ، حالىققا بەرەدى. وزدەرى قىمباتقا العاسىن، ەلگە ۇسىناتىن زايمدارىنىڭ ستاۆكاسىن دا وسىرەدى دەگەن ءسوز. كرەديتتىڭ مولشەرلەمەسى ونسىز دا كوپ قازاقستان ءۇشىن (حالقى ءۇشىن) بۇل جەڭىل تيمەيدى. "
بۇدان نەسيە الۋشىلاردىڭ سانى ازايادى، ۆاليۋتا نارىعى رەتتەلەدى، تەڭگەنىڭ قۇنىن ءسال دە بولسا ۇستاپ تۇرامىز"، - دەگەنى - دالباسا! بانكتەرگە نەسيە سۇراپ كەلگەن كيىمى جۇپىنى كەمپىر-شالدىڭ لەگى ازايا قويماس. تۇرعىنداردىڭ نارازىلىعى ودان سايىن ءورشي ءتۇسىپ، سوڭعى كەزدەگى الەۋمەتتىك-قوعامدىق تەڭسىزدىكتىڭ جالعاسىنا اينالادى. سوسىن، ارانداتۋشى دەگەن ەكى-ۇش ادامدى شۇقىپ تۇرىپ كورسەتەدى، - دەگەن پىكىرىن جەلىدە جالعاس زەينوللا جازادى.
...
ۇلتتىق بانك ءتوراعاسى ەربولات دوسايەۆ ۇلتتىق بانك تەڭگەنىڭ ەركىن وزگەرمەلى ايىرباستاۋ باعامى رەجيمىن ۇستاناتىنىن راستايدى. سوعان قاراماستان، وزگەرىستەر ورىن العاندا قارجى جۇيەسىنىڭ ءتۇراقتىلىعىن قامتاماسىز ەتۋ ءۇشىن ۆاليۋتالىق ينتەرۆەنسيالاردىڭ جۇرگىزىلۋىن جوققا شىعارمايدى.
"ۇلتتىق بانك الەمدىك ەكونوميكاداعى جانە حالىقارالىق نارىقتاعى جاعدايدىڭ دامۋىن مۇقيات باقىلاۋدا جانە قاجەت بولعان جاعدايدا قازاقستاننىڭ قارجى نارىعىندا تۇراقتىلىقتى قامتاماسىز ەتۋ ءۇشىن قوسىمشا شارالار قابىلداۋعا دايىن"، — دەدى ە. دوسايەۆ.
